Argitalpena: ‘Bihotz-bihotzetik’ (+ 2 urte)

 

Katu bat eta arrain bat protagonista dituen 20 orrialdeko album ilustratua da Bihotz-bihotzetik. Emile Jadoul irudigile belgikarraren lana da, eta Ibaizabalek argitaratu du aurten Ipurtargia bilduman. Arrainak asko maite du bere adiskide katua, eta behin eta berriz jakinarazten dio: “Maite zaitut. Eta zuk, maite al nauzu?”. Katuak, ordea, ez daki zer erantzun. Arraina ahula da eta katu ahaltsuaren eskuetan dagoelarik, tentsioa igo egiten da orriz orri katuak arraina maite ote duen ala jan egin nahi duen argitu bitartean. Aurreratuko dugu amaiera zoriontsua duela ipuinak, eta adiskidetasunaren aldeko aldarria egiten duela.

Ahul-ahaltsu desoreka hori oso iradokitzailea da, haurrek askotan bizi duten egoera delako. Bi urtetik gorako umeendako ipuina da.