Oso lagungarria gerta daiteke gertukoren baten heriotza izan duenari; edo haur txiki bati heriotzari buruz hitz egin behar dion heldu bati.

8484642275.08.LZZZZZZZ

Ama hil eta gero oso maitekiro kontatzen da katagorri-kumearen sufrimendua. Alde batetik, buruan bueltaka dabiltzan sentimendu kontrajarriak (bakardadea, haserrea amaren faltagatik, etab.) eta, bestetik, aitaren ahaleginak semeari laguntzeko. Hontza ere -basoko laguna- saiatuko da katagorriari babesa ematen, baina paisaiak eta inguruan duen guztiak amaren gogoa ekartzen diote.

Kalandraka argitaletxeak kaleratu zuen Ez da erraza, katagorri, 2003an. Egilea Elisa Ramon da (itzultzailea Koldo Izagirre) eta ilustrazioak Rosa Osunarenak dira. 40 orrialdeko liburua da, 6 urtetik gorako umeentzako gomendatua.

Gaia ulertzeko zaila izan arren, oso modu gozoan eta sinesgarrian dago islatuta. Berehala antzematen dugu protagonistaren tristura eta aitaren azalpen guztien aurrean bere ulertezintasuna. Aitaren egitekoa ere bikain agertzen zaigu: ondoan dago eta aldi berean errespetatzen du katagorriak bakarrik egoteko duen desioa. Izan ere, gertaera ulertu arte ez baitu ez jolasteko ez jateko gogorik. Amaieran, gaia hobeto antzematen duenean, katagorriak berak aitaren presentzia eskatuko du, sentitzen duena konpartitu behar duelako.

Marrazkiei begiraturik, tonu grisak alaiagoekin tartekatzen ditu ilustratzaileak. Ederto adierazten dute gaia, zuzenean. Testua bera irakurri barik ere ulertzeko aukerakoak dira.