Argitalpena: ‘Saba eta landare magikoa’ (+ 8 urte)

Yann Dégruel idazle frantziarrarena da Saba eta landare magikoa komikia. Ttarttalo argitaletxeak kaleratu zuen iaz.

Abisinian —antzinako Etiopian— kokatzen da istorio hau eta kafe-landarearen aurkikuntzaren kondaira azaltzen du. Istorioa bi mailatan kontatuta dago: lehen planoan aitona batek ipuin bat kontatzen du bere herrixkan, eta bigarren planoan Saba neskatila txikiak kafe-landarea aurkitzen du mendi punta batean ahuntz baten bitartez.

Jakin-mina, arriskua, askatasuna, babesa, haserrea, munduarekiko irekitasuna… lantzen ditu komikoak. Lan osoan marroia da kolore nagusia, Abisiniako biztanleen larruazalaren kolorea, eta, batez ere, hango lur lehorra irudikatzeko.