Pare bat ordu eta erdiko mendi txangoa proposatzera gatoz gaurkoan. Aritxulegitik gertu dagoen Arritxulo aterpetik abiatzea proposatzen dugu. Aparkaleku egokia dago bertan eta baita ere ostalaritza zerbitzua.

Oiartzun eta Lesaka lotzen dituen GI-3420 errepidea erreferentzia hartuta eta aterpearen gaineko aldean dagoen tunela zeharkatu gabe aurkituko dugu gorantz egiten duen mendi pista bat, eskuinera.

Hortik abiatuko dugu txangoa marka zuri-gorriak jarraituz. GR-121aren markak dira.

Bianditz mendi puntarako bidean ehiza postuak, mairubaratzen lepoa eta Errengako kromlechak aurkituko ditugu. Aiako Harriaren ikuspegi ederra dago eguraldiak lagunduz gero eta kosta ingurua ere ikus daiteke.

Igoera, gainera, ez da oso gogorra. Familia giroan egiteko moduko txangoa da, zalantzarik gabe. Itzulera leku berdinetik egiten da.