Txatxilipurdik, Leintz Eskola Kirola, Besaide M.E eta Gaztetxeko Haur eta Guraso Asanbladarekinbatera NATURAN JOLASEAN lemarekin maiatzak 19 larunbaterako egitarau berezia antolatu dute.

Ikerketek eta berezko esperientzia pertsonalek erakusten dute gaur egungo haurrek eta familiek natura behar dutela. Gero eta kontaktu txikiagoa eta azalekoagoa dugu naturarekin eta joera honek eragin kaltegarriak ditu gure haurren eta familiengan. Natura ordezkorik ez duen osasun, ongizate, ikasketa eta sormen iturri agorrezina da. Interakzio zuzena funtsezkoa da zentzumenen eta adimenaren garapenerako; baita garapen sozial eta afektibitatearentzako ere.

Honetaz jabetuta eta gai honekiko Txatxilipurdi elkarteak azken urteotan hartutako konpromisoari jarraiki (besteak beste, Heike Freireren “Educar en verde” liburua euskarara itzuli eta argitaratu zuen  2015ean, BERDEAN HEZI). Hirugarren ikasturtea da, Arrasateko elkarte ezberdinekin egun hau antolatzen dutena, lehena “HURBIL GAITEZEN NATURARA” lelopean egin zuten eta izandako arrakastak motibatuta iaz eta aurten “NATURAN JOLASEAN” lelopean antolatu dute egitaraua.

Eguneko egitaraua aurrera eramateko aukeratutako espazio zentrala Monterron izango da. Naturgune hau aukeratu dute herritik gertu egon eta haurrak, gazteak zein familiak bertara gerturatzeko erraztasun handia izan dezaketela uste duten  arren, arrasatearrak gutxi erabiltzen dutea uste dutelako.

Hala ere, goizean burutuko den dinamikak herriko beste natur espazio batzuk ere gurutzatuko ditu.

Honakoa da maiatzaren 19rako proposatzen digute egitaraua:

  • 10.30-12.30 Gynkana. Herriko Plazan hasita Santa Barbara parkean burutuko da. Gynkanaren helburua jolasa medio, Arrasateko espazio naturalak jolaserako baliatzea izango da. Gynkana hau Leintz Eskola Kirola, Besaide M.E. eta Txatxilipurdiren artean dinamizatuko dute.
  • 15.00etatik aurrera Monterronen JOLAS LIBRE ETA ESPONTANEORAKO gunea. Monterronek eskaintzen duen espazio naturala aprobetxatuta eta bestelako material natural batzuk gehituta jolas libre eta espontaneoaz gozatzeko aukera izango da. Jolas gune honetan material desberdina egongo da parkean zehar eta helburua haurrek modu librean hauek erabili eta jolastea izango da. Hainbat bidelagun egongo dira parkean zehar baina printzipioz ez dute haurren jolasa gidatuko.
  • 16.00etan Monterronen oihal akrobazia. Arrasateko gaztetxeko kideen laguntzarekin oihal akrobazia praktikatzeko aukera izango da.
  • 17:00etan Monterronen Gaztetxeko Haur eta Guraso Asanbladaren eskutik 0-6 urte bitarteko haurrentzat, Txikiginkana, Jolas txokoak, Sorpresak… izango dira.

Egitarau honekin haur, gaztetxo zein helduak naturgunean jolasean jartzea da asmoa.  Aurretik aipatu bezala, natura pertsonon garapen integralerako iturri agortezina delako eta berau zaindu eta maitatzen jarraitzeaz gain, beronekin dugun harremana berreskuratu behar delako.

Egitarau honek haur, gaztetxo zein helduen beharrak asetzea du helburu. Behar anitzak dira gaur egun ditugunak eta horiek naturarekin harremanetan asetzeko egitaraua osatu dute; jolasa, hausnarketa, gozamena, sormena, emozioak … denak uztartzeko parada izango da.