Haurrei eta aurre-nerabeei begira proiektu berritzailea dute Aretxabaletan eta Eskoriatzan. EKKO du izena –Eskola, Komunitatea, Kirola, Osasuna– eta urte batzuetako lanketaren ostean aurten jarri dute martxan.  EKKO egitasmoa gizarteratzea da orain asmoa, eta komunitate osoa kontzientziatzea eta sentsibilizatzea gazteekin dauden erronken inguruan. Helburu horrekin aurkeztu dute Inklusioa/ilusioa egitaraua.

Bi herrietako ikastetxeetan ari dira EKKO programa garatzen. LH5-LH6 mailetako ikasleekin eta haien gurasoekin ari dira. Elkarlan ariketa handi baten emaitza da programa; izan ere, egitasmoko parte dira bi herrietako ikastetxeak, Mondragon Unibertsitatea, UDA edo Aretxabaleta Kirol Elkartea, San Juan de Dios ospitalea eta bi udalak. Orain, inklusioa/ilusioa egitaraua aurkeztu dute. Azaroaren 30etik abenduaren 17ra bitartean lau mahai-inguru eta kirol jarduera bat egingo dituzte. Zabalik da izen-ematea kirol jardueretako hemen. Mahai-inguruetan parte hartzea librea da.

Aretxabaletako eta Eskoriatzako udal teknikariak dira Maider Etxaniz eta Myriam Beltran de Heredia; Etxaniz Gazteria teknikaria da eta Beltran de Heredia Adikzioen Prebentziorako teknikaria. EKKO programaren ingurukoak, eta aurkeztu berri duten Inklusioa/ilusioa egitarauari buruzko xehetasunak eman dituzte.