18. urtez jarraian, bertako produktuekin osatutako Ahuzki, Irati eta Orhi saskiak jarri dituzte salgai Zuberoako ikastolen aldeko Eguberrietako saski salmenta kanpainan. Azaroaren 1etik 28ra eskatu litezke ekoizle diren Basaburuko eta Pettarreango guraso eta guraso ohien produktuez osatutako otarrak, eta bailaran hiru banaketa gune egongo dira.

Zuberoako Basaburuko Alozekoa Ikastolaren eta Pettarrango Eperra Ikastolaren aldeko Eguberrietako saski salmenta kanpainari eman zitzaion hasiera atzo. Bertako produktuekin osatutako otarren salmentaren bidez jasotako dirua “euskararen transmisioa bermatzen duten ikastolen alde” erabiliko da, antolatzaileen hitzetan, euskararen geroa bermatzeko “gaurdanik gure esku dagozten dinamikak martxan jartzea” ezinbestekoa baita “bihar eta etorkizunean autonomia haundiago batekin bizitzeko”.

2003tik urtez urte martxan jarri duten egitasmoan, Basaburuko eta Pettarreango guraso eta guraso ohien produktuekin osatutako Ahuzki, Irati eta Orhi saskiak eskuratzeko aukera izango dute herritarrek; hurrenez hurren, 40, 55 eta 70 euroko prezioa dute. Besteak beste, gaztaz, ahate gibelaz, eztiaz edota pastelez osatuta daude otarrak, eta azaroaren 1etik 28ra bitarte, ikaskoli.eus webgunean dago saskiak eskatzeko aukera.

Banaketa abenduaren 9an eta 10ean

Behin eskaera epea itxita, abenduaren 9 eta 10erako aurreikusten dituzte banaketak. Webgunean adierazten duten bezala, dozenaka gune dituzte izendatuta Euskal Herrian barrena.