Buruz, bihotzez, oinez, euskaraz bizi nahi dugu dio 2025eko Nafarroa Oinezeko abestiak. Iñaki Erroz, Paz de Ziganda Ikastolako zuzendariaren arabera, kantak aurreikuspenak bete ditu: “Alaia eta dantzagarria da, euskararen erabilera aldarrikatzen du eta Paz de Ziganda Ikastolako ibilbidea biltzen du”.

Runba erritmoa du aurtengo Nafarroa Oinezeko abestiak; musika, Paz de Ziganda Ikastolako ikasle ohia den Igor Martinez atarrabiarrak sortu du eta hitzak, aldiz, Estitxu Arozena bertsolari lesakarrak idatzi ditu.

Grabazioan, 60 lagun baino gehiago

Hau adierazi du Martinezek: “Oinez jaiak duen bizitasuna eta indarra aldarrikatu nahi izan dugu abiadura eta erritmo biziak, soinu tradizionalekin batera uztartuz. Era berean, ikastolaren motorra den auzolanari dagokion garrantzia eman nahi izan diogu. Horregatik, abestiaren grabazioan 60 pertsona baino gehiagok hartu dute parte”.

Kolaboratzaileen artean Paz de Ziganda Ikastolako ikasle, ikasle ohi, irakasle zein gurasoak daude. Anne Lukin –ikasle ohia–, Maite Txurruka –ikasle ohia eta irakaslea–, Motxila 21eko kide diren Ainhoa Lizarraga eta Andoni Zilbeti –ikasle ohiak–, Ionan Peñalver –ikasle ohia–, Julen Leuza –ikasle ohia–, Hutsun Txalaparta –Mikel Urrutia eta Anai Gambra, ikasle ohiak–, Paz de Ziganda Ikastolako abesbatza eta Paz de Ziganda Helduen Abesbatza dira horren adibide. Eta haiekin batera, Euskal Herriko abeslari ospetsuen laguntza ere izan dute: Eñaut Elorrieta, Pirritx, Porrotx eta Marimotots, Claudia Rodriguez –Goxua’n Salsa–, Imanol Viñaras –Raimundo el Canastero– eta Oihana Fernandez –Afu–, esaterako. Gainontzeko musikariei dagokienez, Goxua’n Salsa taldeko haizeak, Jorge Sanchez gitarra-jolea eta Xanti Etxeberria baxu-jolea izan dituzte.

Bideoklipa ere bai

Abestiaren ildo beretik sortu da bideoklipa. Haren sorkuntza eta edizioa Paz de Ziganda Ikastolako ikasle ohia den Diego Azanzak egin du. Bertan, “elkartasuna eta auzolana” dira nagusi, eta ikastolak sortzen duen “komunitate erraldoia islatu eta sustatzen” dela diote. Bideoklipean ikastolako ikasle, ikasle ohi, irakasle eta gurasoak agertzen dira eta Paz de Ziganda Ikastola ez ezik, haren hazkundearen lekuko izan den herria ere agertzen da: Atarrabia.

Buruz, bihotzez, oinez

Kantuak hau dio: “Buruz, bihotzez, oinez, euskaraz bizi nahi dugu”, eta horrela azaldu dute abestiaren letra: “Buruz egin dugu, helburu argi batekin, auzolana aldarrikatuz eta haur, gazte eta helduak dantzarazteko asmoz. Bihotzez egin dugu, euskara eta Atarrabia herria erdigunean jarriz. Eta azkenik, oinez egin dugu, abiadura biziz aurrera eginez, baina gure iragana eta erroak ahaztu gabe”.