Guraso eta hezitzaileentzat ederra da haur eta gazte literatura baliatzea. Bidaiatu, mundu berriak ezagutu, ez sinesteko pertsonaiak irudikatu… Haur eta gazte literatura deskubritu eta gure  seme alaba edo haurrei eskaintzea, gozamenerako aukera ederra da.

Galtzagorri elkarteak, euskarazko  haur eta gazte literatura sustatzen du, baita honen inguruko hausnarketa ere. Gaurkoan elkarte honek  mimoz ekoitzi eta argitaratzen duen Beinhola aldizkaria aurkeztu eta gomendatu nahi dizuegu. Guraso, hezitzaile eta haur eta gazte literatura maite duenarentzat aukera ederra.

Behinola Haur eta Gazte Literatura Aldizkaria urtean bitan argitaratzen du Galtzagorri elkarteak. Bertan, artikuluak, erreportajeak, ipuinak, liburu iruzkinak…biltzen dira.

Plazaratu berri dute adibidez  Behinola aldizkariaren, 45. Alea. Gazte-literatura da aldizkari guztia ehuntzeko erabiltzen duten aria. Ramon Saizarbitoria idazlearekin hitz egin dute  gazte-literatura den misterioaz, izan ere, ba al da gazte-literaturarik?

Begoña Durruty ilustratzaileak egin ditu azala eta kontrazala, baita “Sormenez” ataleko ilustrazioak ere Peru Magdalena idazleak jarritako puntuari jarraituz. 

“Lau eskutara” idatzi dute Andere Garabietak eta Dani Fanok; lehenak gaztetasunetik bere irakurle-esperientzia kontatuz eta bigarrenak Xabiroi komiki-aldizkariaren inguruko artikulua josiz.

Galtzagorri Elkartearen gaineko albisteez gain, ihaz argitaratutako liburu onenen iruzkinak eta haiekin batera gazteei eskaintzeko kalitatezko zenbait obren iruzkinak ere aurkitu daitezke azken alean, beti erreferentzia polita etxera kalitatezko liburuak eramateko. 

Horrez gain, Lander Majuelo Igelako editoreak bere liburu kuttuna zein den kontatu du eta Mikel Ayerbek EHUko literatura irakasleak euskaraz irakurri nahiko lukeen obra bat aurkeztu du. Denbora-pasak ere aurki ditzkegu Iñaki Landa ilustratzaileak sortuak.