Entzumen organoak lubrifikatzeko sortzen du argizaria gure gorputzak eta arrotzak diren eragileetatik babesteko ezinbestekoa da. Bakterioak, hautsa, ura… asko dira entzumen aparatua kaltetu dezaketen agenteak eta erraztasun handiarekin sartzen dira entzumen hoditerian.

Gorputzak modu naturalean kanporatzen du sortzen duen argizaria. Murtxikatzen dugunean botatzen dugu kanpora belarrietan pilatutako argizaria. Masail hezurraren mugimenduak bidaltzen du argizaria belarriaren goiko aldera kanporatua den arte.

Genetikak zehazten du bakoitzak sortzen duen argizari kantitatea. Hala ere, batzuetan gehiegi bota daiteke.

Argizari larregi pilatzen denean

Batzuetan gertatzen da gorputzak kantitate handiegietan sortzen duela argizaria. Arazoa beste bat ere izan daiteke. Hain zuzen ere, gorputzak ez duela argizaria modu egokian kanporatzen. Horrelakoetan gertatzen dira argizarizko tapoiak. Haurtzaroan nahiko ohikoak izaten dira; izan ere, haur txikietan entzumen aparatuko hoditeria txikia da eta diametro estukoa. Tapoi arrisku handiagoa eragiten du horrek.

Argizarizko tapoiak belarria itxita egotearen sentsazioa ematen du, baina gehienetan ez da, berez, mingarria. Beste gauza bat da infekzio bat egotea.

Jakin behar da, baita ere, argizarizko tapoiak ez direla umearentzat arriskutsuak berez, baina entzumen aparatua oso sentikorra da eta edozein zalantzaren aurrean sendagilearengana jo behar da.

Tapoiak sortzearen arrazoiak

Kontrakoa pentsatu arren belarriak garbitzeko kotoizko txotxak ez dira gomendagarriak. Txotx horiek maiztasunez erabiltzeak areagotu egiten du argizarizko tapoiak pairatzeko arriskua. Argizari gehiago sortzen du gorputzak. Hala, garbiketa gehiegi egiteak errebotea eragin dezake, eta gehiegizko ekoizpena eragin.

Tapoiak erabiltzen direnean, bestalde, belarriaren alde sakonera bultzatzen dugu argizaria eta bertan pilatzeko joera dago.

Argizarizko tapoiak sortzeko bestelako arrazoien artean dago entzumen gailuak erabiltzea. Belarriak zaratatik edo uretatik babesteko tapoiak maiztasun handiz erabiltzea ere izan daiteke tapoiak eragiteko arrazoia.

Askotan bainatzea ere kontuan hartu beharreko faktorea da; izan ere urak puztu egiten du argizaria.

Adituek diote hauts handiko eremuetan ibiltzeak ere eragiten dituela tapoiak. Belarrira heltzen den hauts kopurua handia bada ondorioak sumatzen ditu entzumen aparatuak.

Belarrien garbiketa

Belarriak garbitzeko nahikoa dira dutxako ura eta xaboia. Gomendio nagusia da garbiketa maniobra berezirik ez erabiltzea.

Ez da beharrezkoa belarri guztia garbitzea eta garbitu behar bada mugatu kanpoaldekoenak diren belarri atalak garbitzera. Hartz erakuslea iristen den lekura arte garbitzea nahikoa da. Bustitako paperezko zapiak, eskuoihalak edo gazak nahikoak dira.

Gomendio garrantzitsua da, hori bai, ura erabili ostean belarriak ondo lehortzea; izan ere, belarriaren edozein txokotan pila daiteke ura.

Tapoiak kentzeko, profesionalak

Entzumen aparatua organo oso sentikorra da. Belarriak hiru zati ditu: kanpoko belarria, erdikoa eta barrukoa. Azken hori da entzumena eta oreka jasotzen dituen atala.

Entzumen aparatua osatzen duten hodiek 19-20 milimetroko luzera dute, gutxi gorabehera, eta mintz fin, elastiko eta erdi garden bat amaieran. Mintza tinpanikoa.

Uste badugu haur txiki batek –edo norberak– argizarizko tapoia duela garrantzitsua da sendagilearengana jotzea. Belarritik tapoi bat kentzea aditu batek egin beharreko lana da. Ez hasi horrelakoetan etxean; izan ere, tinpanoa kaltetzeko arriskua handia da.