Gipuzkoan zehar aretoen zirkuitua antolatu du Galtzagorri elkarteak seigarren aldiz, eta horietako bat, Adur, adur, ez naiz zure beldur Aretxabaletako liburutegian izan da berriki. Ikastetxeetako ikasle taldeak pasa dira bertatik eta liburutegiaren ordutegian ere irekita egon da aretoa, helduek eta familiek ere bertako liburuak eta arte-lanak ikus ditzaten eta horien gainean hausnar dezaten.

Galtzagorriko literatur aretoak jolas literarioak dira, eta haurrek modu aktiboan hartzen dute parte, Galtzagorri elkarteko dinamizatzaile batek proposatutako jolasean. Bakoitzak gai zehatz bat jorratzen du, eta oraingoan, beldurrari heldu diote. Horretarako Juan Kruz Igerabidek idatzitako eta Aizkorri argitaletxeak argitaratutako Jonas eta Hozkailu Beldurtia liburua erabili dute.

Helburuak

Saioaren helburuak honako hauek izan dira: beldurraren trataera haur literaturan ezagutzea; barruko mamuak eta kanpoko mamuak lantzea; era horretako adierazpen literarioen ezagupena eta azterketa egitea; eta haurrak beldurrari aurre egiteko literaturak eskaintzen dizkion tresnak ezagutzea.