Herri hezitzaile baterako bidean, Bergara Herri Hezitzailea taldea eratu zuten duela urtebete Bergaran.

Herria balio hezitzaileetan oinarritu nahi dute etorkizunean, eta jolasaren garrantzia aldarrikatzeaz harago mugikortasunaren alorrean egiteko bide luzea dagoela diote.

“Guk ulertzen dugu heziketa ez dela bakarrik hezkuntzan ematen eta herri edo auzo guztiak direla hezitzaileak. Hori horrela bada kontua da jakitea zein baloretan heztea nahi dugun eta horri buruz hausnartzeko sortu genuen taldea eta jarri ginen martxan”, azaltzen du Bergara Herri Hezitzailea taldeko kide Lander Juaristi.

Jolasaren garrantzia azpimarratzen dute taldetik baina baita ere mugikortasunaren alorrean egiteko dagoen bide luzea. Bergarak ezarri berria du 30 kilometro orduko abiadura muga erdigunean. “Horrelako ekimenak behar ditugu. Argi dugu nahi badugu gure haurrak edo gu geu herrian modu autonomo eta seguru batean mugitzea –oinez, bizikletan, patinetean…– eta horri lehentasuna ematea baditugula urratsak emateko. Herri bat non haurrak seguru eta ondo egongo diren guztiontzako aproposa izango den herria izango da. Gauza oso xinplea da: haurra herritarra dela kontsideratzea, ulertzea herri ikusteko bere modu propioa duela eta iritzia emateko eskubidea duela”.

Hainbat hitzaldi, hitzordu eta ekimena dituzte esku artean Bergara Herri Hezitzailea taldean. Goiena telebistak egindako erreportajean daude jasota gehienak.