Eskola materialaren prezioak gora egin du, eta familia askoren aukera bilakatu da bigarren eskuko liburuak erostea edota iazko ikasturtekoak saltzen jartzea. Gainera, liburuak bakarrik ez; bestelako eskola materiala ere bai: koadernoak, boligrafoak, motxilak…

Bigarren eskuko produktuak erosi eta saldu daitezkeen aplikazioa da Wallapop eta honek egindako azterketaren arabera, Wallapopen berrerabilitako testuliburuen erosketa %399 igo da aurten espainiar estatuan ikasturteko azken astea uztaileko lehen astearekin alderatuz gero.

Plataformaren datuen arabera, eskolara itzultzeko hilabetea iraila bada ere, familiak askoz ere lehenago hasten dira ikasturte berria prestatzen. Horregatik, mota horretako produktuen iragarkiek %229 egin dute gora aldi horretan.

Gorakada baita EAEn ere

Uztaileko lehen asteko salmenta ikasturte amaierako astearekin konparatuz gero, %100 hazi da EAEn. Hala ere, plataformak aurreikusten du iraileko bigarren astean izango dela salmentarik handiena; izan ere, eskuartean dituen datuen arabera, erabiltzaileen unerik gogokoena da liburuak erosi edo salmentan jartzeko.

Hala, abuztuko azken astea iazko iraileko bigarren astearekin alderatuz gero, liburuen erosketa eta bilaketa %72 eta %113 hazi zen hurrenez hurren, eta plataformara igotako liburuen kopurua, berriz, %56.

Plataformaren arabera 1.400 C02 tona emisio ekidin dira eta 49 milioi litro ur aurreztu.