2020ko otsailaren 13an hil zen Hik Hasi egitasmo pedagogikoaren arima zena: Joxe Mari Auzmendi. Euskadi Irratiak asteburuan gogoratu du proiektu pedagogiko honen sortzaile eta bultzatzailea. Hemen duzu entzungai. 

2017 abenduan Hik Hasi egitasmoak egin zuen Hezkuntza Proposamena zela eta elkarrizketa egin genion guraso.eus egitasmotik. Bertan azaldu zizkigunak ekarri ditugu gaurkoan azalera, hezkuntza legea eztabaidatzen gabiltzan honetan Joxe Mariren Hitzek balioa dutelakoan.

2020ko otsailaren 13an hil zen Joxe Mari Auzmendi. 65 urterekin, minbiziak eraman zuen. Kimika ikasketak egin eta Legazpiko Patricio Etxeberria lantokian aritu zen lanean. Baina laster hezkuntzara egin zuen salto. Legazpiko Haztegi ikastolan sartu zen, gerora Magisteritza ikasi zuen, irakasle elkartean aritu zen eta LAB sindikatuko ordezkari ere izan zen. Sindikatuak irakaskuntza atalean Gipuzkoan izan zuen lehen liberatua. Irakasle lana utzita, beste irakasle batzuekin HIK HASI egitasmo pedagogikoa sortu zuen, izen bereko aldizkaritik sortutako proiektua. Harez geroztik, hamarkadetan euskal hezkuntza eredu propioaren aldeko langile nekaezina izan zen, sare ezberdinak josten ahalegin eskerga egin zuen eta euskal hezkuntzak behar zuen horretara hurbildu nahian beste hainbat ekimen ere sortu zituen, Haziz Hezi edo Oinherri besteak beste.

Testuaren iturria