Bizibideak, Gipuzkoako bizikleta bideen sarea

Gipuzkoa lurralde txikia da baina bizikleta bide zabala du. Horien ezagutza zabaltzeko eta erabilera hedatzeko Gipuzkoako bira ekimena iragarri du Gipuzkoako Foru Aldundiak. “Ibilbide erosoak dira, sinpleak eta irisgarritasun unibertsalekoak, garraio publikoarekin lotutakoak, eta altxor berezi eta bakar hori mantendu eta ezagutarazi egin behar dugu are jende gehiago egin dezan bat bizikleta bidezko eta oinezko mugikortasunarekin”, azaldu du Mugikortasuneko eta Lurralde Antolaketako diputatu Rafaela Romerok.

Webgune berria

Gipuzkoako bidegorrien gaineko webgune berria dago martxan. “Gipuzkoak dituen bizikleta bideen 404 km-tan zehar egin daitezkeen ibilbide guztiak jasotzen dira eta, halaber, bide eta ibilbide guztiak hedatzeko espazio espezifiko bat dago. Gainera, ibilbide bakoitza mapa batean proiektatzeaz gain,  360º-ko ibilbide birtuala egiteko aukera ematen du, modu interaktiboan, eta bisitarientzako baliabide turistikoak eskaintzen ditu, ibilbide bakoitzeko Google Maps-erako lotura batekin”. 

Gipuzkoako bira ekainetik urria

Lurraldeko bidegorriak eta bide berdeak sustatzeko, bestetik, ekintza multzoa dago iragarrita ekainetik urrira Gipuzkoako bira egitasmoaren barruan.

Zazpi udalerritan egingo du geldialdia, eta udalerri horietan karpa bat jarriko da 48 orduz (larunbatak eta igandeak). Bidegorrietan antolatutako irteerak proposatuko dira, oinez edo bizikletaz eta herritarrei informazioa emango zaie Gipuzkoako bidegorri sareari buruz. Bizikleten mekanikako doako tailerretan eta bizikleten material birziklatua duten eskulanetan ere parte hartzeko aukera izango da.

Gipuzkoako biraren egutegia:

. Lasarte-Oria –  Ekainak 25-26
. Arrasate –  Uztailak 2-3
. Errenteria –  Uztailak 9-10
. Eibar –  Irailak 17-18
. Zumarraga – Irailak 24-25
. Andoain – Urriak 1-2
. Azpeitia – Urriak 8-9