Carles Capdevila: “Itsututa gaude guraso perfektuak izatearekin (…) eta guraso zoriontsuak behar dira”

Interesgarria eta atsegina da Carles Capdevila. Zabalkunde handia du heziketaren inguruan egiten duen gogoetak. Elkarrizketa egin diote BERRIAn. Hausnarketarako makina bat abiapuntu eman ditu beste behin kazetari eta dibulgatzaile kataluniarrak.

Elkarrizketan dio, besteak beste, lasaitu beharra daukagula eta seme-alabekin dibertitzen ikasi behar dugula. “Gure seme alabak ezagutu behar ditugu egoki hezi nahi baditugu”. Seme-alabekin komunikatzeko ezinbestekotzat jotzen ditu hitzak erabiltzea, tonua kontrolatzea eta ironia sartzea eta sinisten du gurasoen eta seme-alaben arteko baldintza gabeko maitasunean.

Capdevilaren ustez autonomia garatu behar dute seme-alabek eta gauzak bakarrik egiten ikasi. “7 eta 14 urte bitartean izan beharko lukete horretarako aukera, gaztaroan beren kabuz moldatu ahal izateko (…) Zikintzen utzi behar zaie, zauri txikiak izaten, ongi pasatzen eta bizitzaz gozatzen (…) Jenioak kaleko zelaietan daude, inprobisatuetan”.

Ohartarazten du haur bat hezteko ez dagoela eskulibururik, eta umeek bakarrik eta libre jolasteko eskubidea dutela. “Denborarekin ikasi dut jolas librea dela metodorik onena haurrak zoriontsu hezteko (…) Asko exijitzen diegu maiz; arrakastaren kulturan bizi gara (…) Itsututa gaude guraso perfektuak izatearekin; ez dago guraso perfekturik, guraso zoriontsuak behar dira”, azaltzen du. Mugak jartzea ere ezinbestekoa dauka: “Ekintza bakoitzak ondorioak ditu, eta horren jabe beren kabuz egin behar dira. Baina arau batzuk behar dira. Gatazkarik ez sortzeko ez baduzu mugarik jartzen, akabo”.

Elkarrizketa osorik hemen.

Irudiaren iturria hemen.