Leire Azpiazu erizainak abiatu du Dama izeneko proiektua. Webgunea jarri du martxan eta bertatik gai zehatz batzuen inguruan, gurasoen zalantzak argitzea du helburu. Esaterako, edoskitzearekin lotutako tailerrak dauzka, baita haurraren loari lotutakoak edota elikadura osagarriari buruzkoak ere bai.

“Ama izan nintzenean arazo batzuk izan nituen hasieran edoskitzearekin eta gero loarekin. Konturatu nintzen profesionalon aldetik batzuetan formakuntza edota momentuko informazio eguneratua arlo askotan motz gelditzen zela edo ez zegoela. Pertsonalki pasa nuen esperientziak eraman zidan pentsatzera hemen zerbait ez doala ondo eta horrek animatu ninduen edoskitzean eta baita ere haurraren loan ikasketak sakontzera. Hortik sortu zen Dama”, azaldu du Azpiazuk.

Haurraren loaren aholkulari izateko, Gentle Sleep Coach ziurtagiria lortu du online egindako formakuntza baten ostean, eta horrekin, Euskal Herriko lehen lo aholkulari bihurtu da.

Dio bere zerbitzu guztien artean arrakastatsuena dela hain justu ere loari lotutakoa: “Jendeak gehien bat haur loari buruzko zerbitzuari buruz galdetzen du, nahiz eta edoskitzea eta elikadura osagarriaren inguruan ere beti dauden zalantzak edota laguntza beharrak. Lehen sorospenak ere eskaintzen ditut eztarri-trabatzeen inguruko zalantza ugari ere egoten baitira. Orain Baby Led Weaning metodoa asko erabiltzen da eta guraso askori beldurra ematen dien puntua eztarri-trabatzeena da. Ni erizaina naizen aldetik ere, gomendio batzuk ematen ditut”.

Pandemiak eraginda zerbitzu guztiak online bitartez eskaintzen ditu gaur egun eta blog bat ere badauka. Bertan, hilero gurasoen interesekoa izan daitekeen gai bat lantzen du.