Debagoieneko DebaTea elkarteak DebaTearen mundua izango den espazioa ireki du Arrasaten. Arizmendi Ikastolako Uribarri guneko Urbarzubi gelan kokatuko da eta bertan, terapia okupazionaleko esku-hartze zerbitzua eskaintzen hasiko dira. Elkarteko kideentzako zerbitzua izango da; hau da, TEA (Espektro autistaren nahasmendua) duten haurrei zein aniztasun funtzionala dutenei. Uribarri gunean terapia okupazionaleko esku-hartze zerbitzua emango dute.

“Ikusten genuen bailaran zerbitzu gutxi zeudela. Gasteizera, Donostiara, Azpeitira… joan beharra izaten dugu. Horrek estresa sortzen du gure umeengan, eta denbora eta dirua ere suposatzen ditu. Pentsatu genuen hemen sortzea zentro bat zerbitzu ezberdinekin. Ateak jotzen hasi ginen eta urtebetean lortu dugu”, azaldu du DebaTea elkarteko kide Izaskun Diaz de Gereñuk.

DebaTeako kideek eskertu egin dute hainbat eragileren partetik jasotako laguntza eta babesarengatik: Arrasateko Udala, Aretxabaletako Udala, Kulunka Elkartea, Kurtzebarri Eskola eta Arizmendi Ikastola. Proiektua errealitate bihurtzen lagundu eta eta oso eskertuta daude. Hain zuzen ere, asteon egindako aurkezpenean izan dira hainbat ordezkari.

Urtebeteko ibilbidea

DebaTea duela urtebete errotu zen elkarte gisa, eta, familiek euren seme-alabentzako ekintzak antolatzeaz batera, sentsibilizatzeko eta ezagutzera emateko saioak ere egin izan dituzte. Zerbitzu berriarekin bailaran bertan terapia jasotzeko aukera izango dute. Helburuan da haurraren garapen optimoa sustatzea. Nekane Atxa terapeutak gidatuko ditu saioak.

“Terapia okupazionala egingo dugu hemen. Etorriko diren haurrei lagunduko diegu eta beraien indarguneen eta lanerako helburuan arabera prestatuko ditugu jarduerak, helburua izanik ahalik eta autonomoen izatea eguneroko jardueretan”, esan du Atxak.

Lanerako modua ezberdina izango dela gaineratu du; izan ere, autismoaren espektroa oso zabala da bakoitzak ezaugarri jakin batzuk ditu. Zerbitzua elkartekideentzat izango da, eta eskaripekoa.

Izena emateko edo informazio gehiagorako, debatea.elkartea@gmail.com helbidera idatzi, edo, 641 350 324 telefonora deitu daitekeela adierazi dute.