Larunbatean, maiatzak 2, aldarrikatu zen Eskola Jazarpenaren Aurkako Nazioarteko Eguna. Hainbat elkartek eta erakundek baliatu zuten eguna gizartean dagoen arazo latz horri ikusgarritasuna emateko. Askotariko leloak eta premisak nabarmendu ziren. Horien artean, bullyinga denon arazoa dela, eta ez dela bakarrik umeen kontua.

Gaur goizean egin dute agerraldia, Gasteizen, Hezkuntza sailburuorde Begoña Pedrosak eta Hezkuntza ikuskari nagusi Maite Ruizek.

Araba, Bizkaia eta Gipuzkoako datuak eman dituzte, eta azaldu dute aurreko ikasturtean –2019-2020– ehun jazarpen kasu identifikatu zituela Hezkuntza Sailak EAEn. Hezkuntza Ikuskaritzak 795 kasu aztertu zituela esan dute, eta %12,58 baieztatu zirela.

Aurreko ikasturteko datuekin alderatuta aztertutako kasu kopuruan igoera apal bat egon dela adierazi du –755etik 795era–, baina ez da hein berean igo jazarpen gisa baieztatutako kasuen kopurua. Dena den, gehiago izan dira; 96 kasutik 100 izatera igaro baitira.

Hala, egonkortu egin da azken bi ikasturteetan jazarpen gisa identifikatutako kasuen kopurua: 2018-2019 ikasturtean, %12,72 izan zen, eta 2019-2020 ikasturtean %12,58.

Horrela bada, nabarmentzekoa da azken hamarkada pasatxo honetan Hezkuntza Ikuskaritzak aztertutako kasuen kopurua hamar aldiz biderkatu dela. “2008-2009 ikasturtean 75 kasu izan ziren, eta joan den ikasturtean 795”.

Ez da gauza bera gertatu jazarpen gisa identifikatutako kasuen kopuruarekin. Hamabi urteko epean 30 kasu identifikatzetik 100 kasu identifikatzera pasa dira EAEn.

Hezkuntza komunitatean zein gizartean bullying-arekiko gero eta sentsibilitate maila handiagoa dagoela azaldu dute EAEko hezkuntza arduradunek, eta horrek batera ikastetxeek zein Hezkuntza Ikuskaritzak gero eta arreta handiagoa jartzen dutela. Hezkuntza sailetik bultzatutako Bizikasi ekimena azpimarratu dute Pedrosa eta Ruizek.

Kasu gehienak Bigarren Hezkuntzan eta sarean

Jazarpen gisa identifikatutako EAEko kasu gehien Bigarren Hezkuntzan gertatu direla azaltzen dute datuek: 100 kasutik 63 etapa horretan eman baitira. “Antzeman diren kasuen izaera edo tipologia aztertuz, berriz, gehien gertatzen diren eraso motak honako hauek izan dira: hitzezko erasoak, bazterketa edo marjinazio soziala, edo eraso fisikoa. Azpimarratzekoa da, bestalde, identifikatutako kasu horien %25 nagusiki Internet bidezko jazarpena dela; sare sozial edo bestelako bitarteko zibernetikoren baten bidez gertatu dela”.

Euskal Autonomia Erkidegoak eta Nafarroak 116111 telefono zenbakia dute eskola-jazarpen kasuak salatzeko.