Askotariko baliabideak eta jolasak proposatzen ditu, eta euskaraz ere egoteaz gainera dibertigarria eta hezitzailea da.

Doremi Musika Bizi!! atari digitalari buruz ari gara. Donostiako musika eta dantza eskolako irakasle talde batek sortua da. Besteak beste, Ana Huartek eta Juanjo Ocónek, Donostiako musika eta dantza eskolako klarinete eta tronpeta irakasleak.

Jolasa sustatuz egiten dira ariketak eta zailtasun mailaren arabera lau ataletan banatuta daude.

  • ‘Txikien txokoa’ atalean 4-5 urtetik 8 urte bitarteko gaztetxoentzako askotariko materiala.
  • ‘Oinarrizko maila’ atalean 8-12 urte bitarteko erabiltzaileentzat dago bideratua. Irakaskuntza arautuaren oinarrizko mailari dagokio, gutxi gorabehera.
  • ‘Erdi maila’ atala musika eskoletako 3. mailan edo kontserbatorioetako erdi mailan daudenentzat dago bideratua, edota entzumen gaitasun musikala hobetu nahi duten guztientzat.
  • ‘Goi maila’ atala ezagutza indartu nahi duten erabiltzaileentzat dago bideratua.

Askotariko jolasak eta ariketak

Materiala euskaraz nahiz gaztelaniaz aurki daiteke. Oso intuitiboa da eta erraz uler daiteke nola erabili. Txikien txokoan agudoak eta grabeak, doinu tristeak edo alaiak, eta azkar eta poliki moduko kontzeptuak bereizten has daitezke umeak daiteke.

Gero etorriko dira instrumentuak identifikatu, instrumentuak parekatu, belarri zopa, soinuen gurutzegrama edota mamu instrumentua moduko ariketak.

Egin bisita. Ziur aurkitzen dituzuela ikasteko eta jolasteko proposamen interesgarriak.