Arrasateko Udalak nerabe eta gazteekin harremana duten hezitzaile, begirale eta entrenatzaileei zuzendutako ikastaroa antolatu du azaroaren 10ean eta 12an. Formakuntza edonorentzat dago zabalik, eta parte-hartzaileek titulazioa jasoko dute.

Alkoholaren eta beste drogen kontsumoari lotutako arriskuak murriztea da ikastaroaren helburua. Izan ere, aisialdian, kirolean, kulturan eta hezkuntzan aritzen diren pertsonek nerabe eta gazteen hurbileko erreferente izateko aukera dute, eta, horren bidez, prebentzioari buruzko mezuak helarazi eta drogen inguruko elkarrizketak sustatu ditzakete.

Hazkunde elkarteak emango du formakuntza, euskaraz, azaroaren 10ean eta 12an, 14:00etatik 17:00etara, Arrasateko Kulturateko Garibai gelan. Nerabe eta gazteekin lan egiten duten pertsonei zuzenduta badago ere, ez da beharrezkoa arlo horretan jardutea izena emateko.

Interesatuek azaroaren 4ra arte eman dezakete izena, Arrasateko Udalaren izen-emate atarian.