Aukerak suspertzen programak eskolaz kanpoko hezkuntza-laguntza eskaintzen die gizarte-desabantailan dauden umeei eta nerabeei.

Martxoko itxialdian abiarazi zuen Eusko Jaurlaritzak gizarte ekimeneko hainbat eragilerekin batera, eta une honetan Arabako, Bizkaiko eta Gipuzkoako 1.208 adingabeei zuzentzen zaie. Arduradunek jakinarazi dute beste 162 neska-mutiko daudela programan sartzeko puntuan.

Hezkuntza prozesua jarraitzeko zailtasunak dituzten LHko eta DBHko neska-mutikoak dira onuradunak. Horietako asko gizarte-desabantaila egoeran daude, bestek beste, arrakala digitalaren ondorioz.

Hala, gailu informatikoak eta konektibitatea eskuratzeaz gainera, eskolaz kanpoko hezkuntza-laguntza jasotzen dute, bai adingabeek bai gurasoek. “Ideia da azken horiek ere trebetasun digitalak, parentalak edota hizkuntza-gaitasunak garatzea gero seme-alabei ikasketa-ohiturekin laguntzeko”, esan du Eusko Jaurlaritzako Berdintasun, Justizia eta Gizarte Politiketako sailburu Beatriz Artolazabalek urtemugako balantzea aurkezteko aste honetan egindako agerraldian. Besteak beste, Jokin Bildarrats Hezkuntza sailburuarekin batera hartu du parte ekitaldian.

Artolazabalek gaineratu du Inor Atzean Utzi Gabe COVID funtsaren bidez iaz sustatutako zortzi programetako bat dela Aukerak suspertzen, eta hezkuntza berdintasunerako tresna dela. Datu esanguratsua ere eman du; programan dauden neska-mutikoen %46 familia gurasobakar amadunetakoak dira.

Boluntarioak oinarri

Gizarte ekimeneko Agintzari kooperatibak koordinatzen du Aukerak suspertzen programa. Auzolanean eta tokiko boluntarioekin burutzen den programa da. Hain zuzen ere, programak aurtengo urtean iraun du, eta asmoa da uztailean ere programa martxan egotea.

Agintari kooperatibatik boluntarioak behar direla adierazi du. Aurreratu dute boluntarioen ordutegi aukeraketa errespetatzen dutela eta disponibilitate horretarako moldatzen dituztela errefortzu eskolak. Bakoitzak erabakitzen du ze ordu kopuru duen eskaintzeko, eta zein unetan.

Etxeko lanak eguneratuta eramatea laguntzen dute boluntarioek edota konpetentzia desberdinetan errefortzua eskaintzen dute. Interesatuek 688 76 54 05 telefono zenbakian jaso dezakete informazio gehiago.

Jarraipena izango duen programa

Aurrera begirako aurreikuspena da programak egitura propioa izatea. Jarraikortasuna behar duen behar estrukturala dela ondorioztatuta Eusko Jaurlaritzak erabaki du Familia eta Haurren Zuzendaritzaren aurrekontuan sartzea, eta hurrengo urtean mantentzea. Aurrekontua ere areagotu egin du. 2021 ekitaldirako 1,3 milioi euro aurreikusi dira.