Hezkuntza Sailak sustatutako Hauspoa proiektuak jarduerak eta denborak berrantolatzea du helburu eta baita ere indartze-guneak eta tailerrak eskaintzen dizkiete ikasleei. Hasieran, EAEko 28 ikastetxek egin zuten bat horrekin, eta gaur egun, 53 dira.

Aretxabaletako Kurtzebarri institutuan, esaterako, azken lau urteotan dihardute Hauspoa proiektuarekin. Hiru helburu ditu proiektuak institutuko zuzendari Juan Carlos Pascual Pascu-k azaltzen duenez: “Eskola denbora eredu berriak martxan jarri eta ebaluatzea; ikastetxearen kalitatea hobetzea; eta emaitzen hobekuntza sustatzea”. Eta horien barruan beste hainbat daudela dio; besteak beste, konpetentziak bermatzea, elkarbizitza sustatzea eta euskararen erabilera bultzatzea eskola ordutegitik kanpo.

Hiru esparru, sei tailer

Behin eskola orduak bukatutakoan dator Hauspoaren txanda eta hiru esparru ezberdin daude hor. Batetik, indartze-gunea: “Bideratutako ikasleak dira; hau da, ikasgairen batean edo bestean premiaren bat duten ikasleak Hauspoa arloko indartzera bideratzen dira”. Ikasgai horiek astean hiru egunetan jasotzen dituzte.

Bestetik, ekite-gunea dago: “Etxerako lanak egin, talde-lanak aurrera eraman eta ordenagailua erabiltzeko aukera ematen duen gunea da, etxean halakorik ez dutenak egon daitezkeelako”.

Eta hirugarren gunea tailerrak dira. Bigarren hiruhilekoan hamaika jarduera eskaini dituzte Kurtzebarri institutuan, eta horietatik honako hauek dira abian jarritakoak: GSR zaharren egoitzan lagun egitea; Haur Hezkuntzako patioaren kudeaketa; boleibola; mekanografia; eskulanak; eta emakumezkoei bideratutako autodefentsa tailerra. “Azken hori zortzi orduko ikastaroa izan zen, baina oso arrakastatsua”.

Gainerako tailerrek ere arrakasta handia dutela dio Pascualek: “GSR zaharren egoitzan ikasle bakoitzari hiruzpalau egoiliarren ardura eman diote eta horiei laguntza eman eta jarraipena egiten diete jarduera ludikoetan”, dio, eta gaineratu du: “Beste batzuk Haur Hezkuntzakoekin egoten dira atsedenaldietan eta jolasak antolatzen dituzte horiekin”.