Edari alkoholdunekin parekatu ditu edari energetikoak Galiziako Xuntak, osasunari kalte egin diezaioketen substantzia estimulatzaile asko dutelako. Horregatik, neurria hartu dute: 2024tik aurrera debekatuta egongo da edari energetikoak adin txikikoei saltzea eta adingabeek ezingo dituzte produktu horiek kontsumitu. Halaber, lege berri honek barnean hartzen ditu bapeatzaile edo zigarro elektronikoak, eta horiek adingabeei saltzea debekatuko da.

Halako edariek, batez beste, 100 ml-ko 32 mg kafeina dute. Hortaz, 500 ml-ko lata bat bakoitzak 160 mg ditu; hau da, bi kafe hutsek dutena bezain beste. Neurri hau hartzearen arrazoia osasunean izan daitezkeen eragin negatiboak direla azaldu du Xuntak.

Osasun-arazo horiek sor daitezke kafeina nahiz azukre asko edukitzeagatik, eta askotan alkoholarekin nahasteagatik. Arazoen artean daude, loaren alterazioa edo nahasmendu kardiobaskularrak.

Osasun sailak emandako datuen arabera, 14 eta 18 urte arteko galiziarren %40,8k kontsumitu ohi ditu edari energetikoak –mutilek neskek baino gehiago; %49,6 eta %31,2, hurrenez hurren– eta hazten doan kopurua da. Espainiar estatuko batez bestekoa handiagoa da, %50ekoa. Aipatzekoa da munduko zenbait herrialdetan –Letonian, Lituanian, Australian, Zelanda Berrian edota Uzbekistanen, adibidez– 18 urtez azpikoek debekatuta dutela halako edariak kontsumitzea. Kolonbian, aldiz, 14 urtez azpikoei aplikatzen zaie debekua.