Udazkenean, neguan zein udaberrian ere egun euritsu eta hotzak izaten ditugu Euskal Herrian. “Zergatik jolastu naturan euria dagoenean?” artikuluan, eguraldi euritsuarekin ere aire librera irteteak haurrengan izan ditzakeen onurak aipatu genituen. Gaurkoan, egun horietan etxetik, eskolatik, ludotekatik … kanpora, parkera, basora edo landa gunera irteteko jantzi beharreko arropaz jardungo dugu.

ZEIN DA EURIA EGIN ARREN LEHOR ETA BERO MANTENTZEKO MODU EGOKIA?

Hona hemen kontutan hartzeko moduko aholku praktiko batzuk:

  • Jaka eta praka iragazgaitzak, edo jantzi iragazgaitza jantzi.  Praken azpiko aldea boten kanpotik eraman urak galtzerdiak busti ez ditzan, eta txanoa daukan jaka bat aukeratu.
  • Arropa kapa bat baino gehiago eraman, beroa sentitu ahala arropa kentzen joan gaitezke. Lepoa estaltzeko bufanda edo lepo altuko kamiseta bat jantzi.
  • Arropa zaharra jantzi: gogoratu ondo pasatzera goazela eta zikindu egin gaitezkeela. 
  • Uretarako botak jantzi, galtzerdi luze eta sendoekin, behatzak bero egon daitezen eta oinak bota barruan ez daitezen labandu.
  • Txano on bat: iragazgaitza, beroa eta haizearekin ihes egingo ez diguna.
  • Eskularru iragazgaitzak: hotz egiten duen egunetan euriarekin, elurrarekin  eta izotzarekin jolasteko. Gogoratu jolasa amaitutakoan janzteko beste pare bat eramaten.

ABENTURARAKO MOTXILA PRESTATZEN

Jantzita daramagun arropaz gain, abenturan gehiago sakondu eta esperientziari ahalik eta zuku gehien ateratzeko baldintza egokiak izateko motxila bat prestatzea gomendagarria izan daiteke. Hona hemen motxila horretan sartzeko materialak:

  • Botikina
  • Gordeleku bat egiteko materiala: momentuan muntatu daitekeen kanpin denda horietako bat (udan hondartzara eramateko ere balio duena), lona edo plastiko handi bat eta soka.
  • Lurrean esertzeko plastikozko poltsak
  • Neguko egun laburretarako linterna bat. Buruan jartzen den frontala aproposa izan daiteke, eta kontutan izan argi gorria ere baldin badu honek animaliak gutxiago molestatzen dituela.
  • Naturarekin gozatzeko balio digun edozein tresna: kubo bat, pala bat …
  • Argazkiak ateratzeko mugikorra edo makina.
  • Euritakoa eta aldatzeko arropa lehorra
  • Janaria eta edaria: norbait hoztu edo energia beharrean badago zerbait jan eta edateko aukera izan dezan.

Hitz egin inguruan dituzuen haurrekin, irudikatu egun euritsu batean aire librean bizi ditzakezuen abenturak, prestatu horretarako beharrezko izango duzuena eta irten jolastera!

Ezagutzen duzu Putzuetan Plast ekimena?