Uda garaia atzean uzten dugun bakoitzean edo euriak eta hotzak gure egun eguzkitsuak ahaztarazten dizkigutenean,  kanpoan naturan egiten ditugun  jolasei, korrikaldiei eta esperientziei ere agur esateko ohitura daukagu.

Behin eta berriro aipatu ditugu Guraso.eus-en naturararen eta haurrenarteko harremanak sortzen dituen  onurak. Harreman horiek aztertzen, lanean dabiltzan elkarteak edo proiektuak ekarri ditugu gurera, baita ikerketa zientifikoak ere.

Izan gure lanordu amaigabeen ondorioz  edo lau pareten arteko ustezko segurtasunagatik, edo ikasturtearen erritmo biziak eraginda  edo eskolaz gaindiko jardueren egutegiagatik… baina batez ere eguraldi txarrarekin lotuta gurasook dugun beldurraren  ondorioz, ikasturtean zehar ez diegu gure seme-alabei kanpoaldeko jarduerak egiteko aukerarik eskaintzen.

Familias en ruta  webgunean gai honen inguruko artikulu interesgarria aurkitu genuen, eta bertan argitaratutako ideia eta lotura batzuk ekarri ditugu gaurkoan.

Nola jantzi gure seme-alabak eguraldi txarrerako?

Askotan gertatzen zaigu euriarekin edo eguraldi txarrarekin kanpoaldean jolasteko jantzirik ez aurkitzea gure arropen artean. Nola jantzi gure haurrak egun hotz euritsu batean  kanpoaldean jolasteko? Galdera honi erantzunez sortu zen amphibiakids izeneko proiektua. Bertatik ideia ezberdinak har ditzakegu.

Euriarekin egiteko jarduera proposamena.

Urarentzako zirkuitu bat eraikitzea aukera polita izan daiteke, putzu handi  bat aurkitu eta bertako urarentzako bidea prestatu. Erabili botila hutsak, latak, tutuak edozerk balio dezake uraren bidea sortzeko.  Euri asko egiten badu hobeto! Gure ubidea probatzeko aukera hobea izango da eta!!

Haizearekin egiteko jarduera proposamena

Haizearekin ere aukerak mila izan daitezke. Bat aukeratu dugu, gaur egungo telefonoei eta teknologiei ere erabilera emateko modukoa gainera. Grabatuko al dugu haizearen soinua? Aurkitu haizeak zarata gehien ateratzen duen lekua edo unea, erabili telefonoko grabagailua eta gero gauean, goxo, etxean entzun grabatutakoa.

Non aurkitu ideia gehiago?

Blog interesgarri bat gomendatu nahi dizuegu, http://www.goingwild.net/ Bertan edozein eguraldirekin naturan gozatzeko ideiak eta baliabideak aurki ditzakezue.