Osagarri hutsa balira bezala saltzen dira, baita modako osagarri moduan ere, baina ez gara ohartzen eguzkitako betaurrekoak oso garrantzitsuak direla begien osasunerako. Ondo aukeratu behar dira, haien betekizuna ez dadin arazo bihurtu. Eta umeek ere behar dituzte. (Iturria: Puntua)
Mercedes Zabaleta doktorea, Poliklinika Gipuzkoako oftalmologoa, oso zorrotza da gai horretan. “Eguzkitako betaurrekoak udan ez dira apaingarri hutsa”, dio, eta horrekin batera, eguzkiaren arriskuak azaltzen ditu: “Gehiegizko esposizioa baldin badago, esaterako, hondartzan babesik jabe jartzea itsasora edo hareara begira, keratokonjutibitis aktinikoa gerta daiteke; kornearen asaldura bat da, erradiazioa zona horretan geratzen delako, eta ordu gutxira min izugarria eragiten du”. Konjuntibitisa da udan gehien errepikatzen den patologia; larrialdietako kasuak %50 igo dira.
Ezinbestekoa da babestea, eguzkiaren gehiegizko esposizioak patologia ugari eragin ditzake-eta begietan. “Bizi-itxaropena handiagoa da, eta erradiazioaren espektroa ere areagotzen doa urteetan zehar, eta patologiak eragin ditzake, bai kristalinoan, bai erretinan; endekapen makularra, esaterako. Eta pterigion izeneko patologia bat ere badago, kornearantz hazten den begiaren azaleko ehundura. Patologiaren hasieran dauden gaixoei esaten diegu betaurrekoak maiz erabil ditzatela, gehiagora joan ez dadin”, azaldu du Zabaleta doktoreak.
Ondo aukeratutakoak
Eguzkitako betaurrekoak ezinbestekoak dira udan, baina ondo aukeratu behar dira, haien betekizuna ez dadin arazo bihurtu. “Optikoak adituak dira, eta bezeroari aholkuak ematen dizkiote beti, baina gaixoak beti ziurtatu behar du eguzkitako betaurrekoak Europako Ekonomiaren Erkidegoak homologatuta daudela eta haren logotipoa daramatela”, zehaztu du Poliklinika Gipuzkoako oftalmologoak.
Gainera, kolore askotariko betaurrekoak daude lortu nahi den babesaren arabera. Adibidez, laranja eta gorri kolorekoek kontrasteak areagotzen dituzte, eta, horrenbestez, goi-mendirako edo ur-kiroletarako erabiltzen dira, “erradiazioa ez delako soilik sartzen dena, baita islatzen duena ere”, azaldu du espezialistak.
Umeak ere betaurrekoekin
Ez dira maiz ikusten adingabeak eguzkitako betaurrekoekin itsasertzean edo gurasoekin paseoan; eta aldatu beharrekoa da hori. “Eguzkitako betaurrekoak haurrengan ezinbestekoak dira, arrazoi hauengatik: fotofobia handiagoa daukate, erretina ez hain garatua eta askoz gardenagoa daukate eta argi gehiago sartzen zaie begietan; horrenbestez, babesgabetasun handiagoa daukate. Gainera, betaurrekoekin askoz ere erosoago joaten dira, begiak behartu beharrik gabe”, azaldu du Zabaleta doktoreak.
Iruzkinik ez "Eguzkitako betaurrekoak ez dira apaingarri hutsa"