Parean elkartearen ekimenez, ipuin inklusiboen gida ikusgai dago iaztik. Gida honetan batu dituzten ipuin eta liburuek, berdintasunean, autonomian, dibertsitatean, errespetuan eta askatasunean euskaraz hezteko lanean lagungarri izan nahi dute. Horretarako, Katakrak liburu-denda eta editorialaren laguntza izan izan du elkarteak.

Ehun ipuin baino gehiagoren proposamenak biltzen ditu gidak; ipuinen artean gai ugari aurkitu daitezke: emakumeek historian egin duten ekarpena ikustarazteko ipuinak, maskulinitate berriak, genero indarkeriari aurre hartzeko proposamenak, homofobiaren aurkakoak, heziketa afektibo sexuala sustatzeko materialak, autoestimua lantzeko ipuinak, emozioak ezagutzeko lagungarri direnak edota familia aniztasuna agertzeko bilduma. Askotariko gaiak jorratzen dituzte, baina ipuin guztiak haurrendako erakargarriak izateko pentsatuak daude.

Gaiekin batera, gaitasunaren arabera aukera daitezke ipuinak. Adibidez, irakur mailaren arabera edota euskara jakin gabe irakurri daitezkeenak. Norberak ipuinak proposatzeko atala ere badu webguneak.