Ziklikoki bizitzen proiektuaren sortzailea da Enara Iruretagoiena Dominguez eta gaztetxoei menarkia eta hilerokoa ikuspuntu zabalagoaz bizitzen laguntzeko gakoak ematen ditu.


Menarkia hitza ez da oso ezaguna; zer esan nahi du?

Menarkia hilerokoaren lehenbiziko aldia da, hilekoaren zikloa lehen aldiz jaisten denean. Eta hilekoaren zikloko beste hainbat hitzekin gertatzen den bezala, menarkia ere ez da oso entzuna. Horregatik, izena bera ere mahai gainera ekartzea oso garrantzitsua da.

Zer dakar lehen aldi horrek?

Hilekoaren kultura lantzen gabiltzanok ikusten dugu, gizarteak duen iruditerian, nerabezaroan bizitzen dugun momentu horrek kutsu negatiboa duela edota ez dela ikustarazten. Beraz, gaztetxoek bizitzen duten momentu hori abiapuntu moduan hartzea eta hortik abiatzea da egiten ditugun topaketen asmoa.

Nola eragiten die gaztetxoei lehen ziklo horrek?

Argi dago denok gogoratzen dugula gure nerabezaroa eta hor gertatzen diren aldaketak zentzu guztietan potenteak izaten direla. Azkenean, gaur egun ere, oso informazio gutxi dugu, eta, bestalde, badago moda moduko bat duela urte batzuk sustatzen hasi dena, non iruditeria horiek berritzen goazen arren oraindik gure gorputzetatik oso urruti gauden. Adibidez, esaten dizutenean nola kontatuko zenukeen gidabaimena atera zenuenean. Gidabaimena dugunok bakoitzak esperientzia bat dugu. Eta esperientzia horiek ez baditugu partekatzen eta aitortzen, oso zaila da beste pertsona bati bide laguntzea toki berri batetik. Izan ere, guk ez dugu gerturatze prozesu hori egin. Beraz, hortik abiatzea da garrantzitsua.