Abesti bilduman atal berri bat sortu dute HitzKeta plataformako kideek. Atal berri horrek ‘Ospakizunak’ du izena eta abenduan sartu berri garenez Gaboneta abesti multzoa egiten hasi dira.

Lehen txanpa honetan 38 kantu bildu dituzte, guztiak euskaraz. Eta bi talde bereizi dituzte: Gabon kanta erlijiosoak (17) eta ez erlijiosoak (23).

Erlijiosoen artean daude, esaterako, Horra Mari Domingi, Olentzero, Trakatan-trakatan hiru errege, Bizarzuri, Mendi aldetik datoz, Alaken… Ez erlijiosoen artean, berriz, Olentzero salda bero, Hator hator, Ole Olentzero, Mari Domingi, Kas kas atean, Elurra mara-mara…

Hainbat euskal artistak edo taldek grabatutako piezak dira. Batzuk bideo formatuan jasota, beste batzuk karaokea egiteko, beste batzuk audio pistaz…

HitzKeta egitasmoa

HitzKeta 2017-2018 ikasturtean hasitako proiektua da, eta Donostiako Irakasle Eskolan azken ikasturtea burutzen ari zirela lau ikasleren eskolako lan batean du abiapuntua.

HitzKetan euskarazko abesti, olerki eta liburu bildumak aurki daitezke atalka sailkatuta. Gainera, bilduma bakoitzarekin batera, berauek lantzeko proposamen didaktikoak daude eskuragarri, baita beste zenbait lanketa ere. “Horrela, haurrentzako euskarazko eta kalitatezko materiala orrialde honetan bildu eta guztientzako eskuragarri jarri nahi izan dugu, sareak eskaintzen dituen aukerak baliatuz”, azaltzen dute sortzaileek.