Erretzea kaltegarria dela jakin behar dute nerabeek
Prebentzioa ezinbestekoa da seme-alaba nerabeak ez dezan piztu lehen zigarroa.
Erretzeak arazo benetan potoloak eragiten dizkie nerabeei –baita helduei ere–. Eta gurasoen ardura da bizitza osasungarriaren alde egitea. Erretzeak menpekotasun handia sortzen du, hortik ateratzea oso zaila den menpekotasuna; hori horrela, hor ez sartzeko ahalegina egin beharra dute gurasoek.
Komunikazioa ezinbestekoa
Prebentzioa ezinbestekoa da seme-alaba nerabeak ez dezan piztu lehen zigarroa. Horretarako oso garrantzitsua da seme-alabekin berba egitea, erretzeak gure gorputzean sortzen dituen kalteen berri izan dezaten. Eta komunikazio onak erabaki onak hartzea ahalbidetuko du.
Gurasoak, gainera, seme-alaben eredu dira, eta zentzuz jokatu behar dute. Erretzailea izanez gero, uztea komeni da, bestela ez dela hain kaltegarria pentsa dezake. Eta familian zero tolerantziaren aldeko erabakia hartuz gero askoz hobeto. Erretzeak dakartzan kalteen gainean sarri berba egitea ere onuragarria da, lehen zigarroa pizterakoan hori izan dezan buruan gazteak.
Nerabezaroan lagunen eragina handia da, baina gurasoak tinko mantenduz gero tabakoaren aurka, nerabe horrek asko murriztuko du haren kontsumoa. Era berean, erretzeak ez duela norberaren irudia hobetzen erakustea komeni da, tartean usain txarra sortzen duelako.
Argazkiaren iturria: Premedpress