Nola jakin seme-alabak telebistaren menpe dauden?
Gurasoek euren seme-alabei bizitzan telebistaz gainera beste hainbat gauza daudela erakutsi behar diete.
Ordu asko igarotzen dituzte neska-mutilek telebista aurrean eta gurasoek nahiago izango lukete bestelako aisialdi moduak bilatuko balituzte. Baina ohiturak aldatzea ez da beti erraza izaten.
Erabilera egokia bultzatuz
Tere Mora adituaren esanetan, modu errazean atzeman daiteke seme–alabak telebistaren menpe ote dauden, aurreneko sintomak ezagutuz gero: “Ordu asko igarotzen ditu eserita telebista programak ikusten; gailutik urrunduz gero erraz haserretzen da; ezin ditu bi ordu igaro telebista ikusi barik”.
Hori horrela, telebistaren erabilera egokia sustatu beharraz egiten du berba Morak. Ariketa bezala, seme edo alabari telebistarik gabe astebete igaroz gero zer egingo lukeen galdetzea proposatzen du: “Nahiz eta hasieran arraro begiratu duen, egunero telebista aurrean esertzeaz gain beste gauza asko daudela erakutsi behar diegu”. Liburu bat irakurtzea, liburutegira joatea, mahai-jokoetan aritzea, kirola egitea, lagunekin irtetea eta beste dira aukeretariko batzuk.
Gurasoek euren seme-alabei bizitzan telebistaz gainera beste hainbat gauza daudela erakutsi behar diete, eta horretarako haiekin jolastea funtsezkoa dela dio Morak eta astebetez telebista ikusi barik egotera animatzea gomendatzen du.