Eskarne Larrinaga: “Guraso askok ez dute mikroindarkeriaren eta mikromatxismoaren kontzientziarik”

Berdintasun agentea, genero politiketan aholkularia, sexologoa, psikoterapeuta eta jakituria afektiboan aditua da Larrinaga. Anderebide elkarteak antolatuta familia dinamiken kudeaketaren inguruko ikastaroa ematen ari da Iurretan. Jabekuntza lantzen du; lidergoa eta harmonizazioa. Eneagrama da erabiltzen duen metodologia. Zutabea da norberak bere burua ezagutzea.
Ikasturte hasiera sasoi ona da familia dinamikari buruz hausnartzeko?
Nire ustez, sasoi ona da hausnarketa pertsonal bat egiteko eta zure familiari buruzko hausnarketa egiteko; familia osoarena. Nik harreman sareak lantzen ditut. Eneagramaren bidez konturatzen zara zergatik hartzen dituzun erabaki batzuk, eta zure familiakoak nondik dabiltzan. Munduan bizitzeko eta fedea izateko bederatzi modu daude, eta zuk ikusi behar duzu zu non zauden kokatuta. Horrela, zure familiakoek jokatzen duten moduan zergatik jokatzen duten ikusi dezakezu. Orekatuta zauden ikusi dezakezu, eta zer egin dezakezun zu zeu orekatzeko eta ingurukoei laguntzeko.

Orekatuta egoteari garrantzi handia ematen diozu.
Orekatuta egotea zeure buruagaz harmonian egotea da, gustura egotea zeure buruagaz. Nik ez dut patologiari buruz berba egiten. Orekatuta zauden, ondo zauden, begiratzen dut. Ahul bazaude, oreka galtzen ari zara. Oreka bat bilatzea da kontua. Norbera ondo egoten ikastea eta besteei ondo egoten laguntzea da asmoa.

Gurasoek zelako tresnak dituzte familia dinamiketan?
Zu ondo egotea eta zure emozioak orekatuta egotea da helburua. Emozio guztiak onartzea garrantzitsua da, umeek mapa emozional guztiak barneratzeko eta beti emozio batean blokeatuta ez gelditzeko. Teoria mailan badaude beste estrategia batzuk, baina estrategia emozionalak gehiago landu beharko genituzke.

‘Supernany’ eta ‘Hermano mayor’ programek ez dituzte arlo horiek lantzen. Zer iritzi duzu horietaz?
Denbora gutxian aldaketa handiak lortzen dituzte, baina jarraipena duten ala ez ikusi behar da. Nik beste ikuspegi bat dut.

Guraso eta seme-alaben artean harremanak asko aldatu dira?
Genero aldaketa egon da, baina horrek ez du esan nahi guraso guztiek kontzientzia hori dutenik. Guraso askok ez dute mikroindarkeriaren eta mikromatxismoaren gaineko kontzientziarik.

Zertan nabaritu daiteke hori?
Emozio arloan ekintza asko daude. Negarrez hasi, eta negar egiten ez uztea, esaterako. “Nesken modura egiten duzu negar”, esaten da oraindik. Ez da onartzen zu triste zaudela. Indarkeria arloan, adierazteko moduak, tonuak, etiketak, irainak… Desberdintasunak daude oraindik.

Elkarrizketa osorik eta argazkiaren iturria hemen.