‘Eskola bisualak’, hezkuntza irisgarriago bat piktogramen erabileraren bidez
![](https://guraso.eus/wp-content/uploads/2024/07/GOI_poster_20091928-1024x576.jpg)
Arizmendi ikastolako Arrasateko umezaintzak Eskola Bisuala ziurtagiria du. Oraingoz, bakarra da EAEn eta gaia lantzen, prestatzen eta praktikan jartzen ibili ostean lortu dute ziurtagiria ikasturte amaiera honetan.
Eskolako guraso baten bitartez izan dute programaren berri Debagoieneko ikastetxeak. Ekimenaren helburua da hezkuntza inklusiboago bat lortzea irudien erabileraren bidez, eta Orange Fundazioak gidatutako programan parte hartuta lortu dute ziurtagiria. “Programa gogorra izan da; lan kontziente bat, irakasleok formakuntza jasota. Pozik gaude”, dio Arizmendi Ikastolako orientatzaile Arantxa Lejarragak. Proiektuaren bitartez lan egiteko modua aldatu eta emaitza aberastu egin dutela gaineratu du.
“Orain arte beti ibili gara zailtasunak dituzten ume konkretuekin lanean, baina, egia esanda, egoerak, inguruneak, ez du laguntzen askotan, eta lan honekin hor jarri dugu arreta. Hau da, eraikina nolakoa den, barruan zer dagoen edo gela bakoitza nolakoa den eta barruan zer egiten den azaldu dugu irudien bidez, seinalizazioen bidez, eta hori oso lagungarria izan da zailtasunen oztopoak gainditzeko orduan”. Helburua hori izanda, egindako lan honek askoren garapenean lagundu duela aitortu du. “Komunikatzeko zailtasunak dituztenendako zein kanpotik etorri eta hizkuntza oraindik ezagutzen ez dutenendako da hau lagungarri. Parte-hartzea handiagoa da, aberasgarriagoa, eta oztopoak presenteago izan ditugu denok”.
Eskola Bisualak materialen eta baliabideen plataforma baterako sarbidea ere eman die, bai eta aholkularitza pertsonalizatua ere, eraldaketa horretan laguntzeko.
Iruzkinik ez "‘Eskola bisualak’, hezkuntza irisgarriago bat piktogramen erabileraren bidez"