7.urtez jarraian, Arrasateko Ingurumen eskolatik Eskolara Oinez egitasmoaren baitan, motordun ibilgailuak alde batera utzi eta oinez mugitzera animatu dituzte Arrasateko ikasle eta irakasle guztiak.

Trafikoaren zarata eta kea gutxitzeko, eskola inguru seguruagoa izateko,  berotegi efektuko gasen emisioa murrizteko edota norberaren osasuna hobetzeko, mugikortasun aktiboa sustatu nahi dute .

Udalako Ingurumen Eskolako kideekin hitz egin dugu egitasmoaren nondik norakoak azaltzeko.

7. urtez martxan jarri duzue “eskolara oinez” egitasmoa, zein da honen helburua?

Mugikortasunaren gaia landu genuen duela 7 urte Eskolako Egenda 21 proiektuan. Urte hartan erabaki genuen martxan jartzea egitasmo hau. Batez ere, sentsibilizazio ekintza moduan planteatu genuen. Ingurumen Eskolara urtero etortzen dira L.Hko talde guztiak eta ingurumenarekin loturiko hainbat ekintza burutzen dituzte gurekin. Eskolara oinez, ekintza horietako bat da eta eskolara oinez joatearen alde onak zein diren, motordun ibilgailuak alde batera uztearen abantailak zein diren,… horretaz guztiaz sentsibilizatzea nahiko genuke. Horrekin batera,  nahiko genuke mugikortasun iraunkor baterako ohitura onak sortzea, ondoren, euren kabuz ere oinez joaten jarrai dezaten.

Hasiera batean, 5. mailakoentzat izan zen eskaintza, baina azken bi urteetan eskaintza zabaldu dugu eta egitasmoan parte har dezakete L.H 3. mailatik 6.maila arteko ikasleek.

Nola jasotzen dute familia eta ikastetxeek egitasmo hau?

Mugikortasunari dagokionean, ikastetxe guztien errealitatea ez da berdina. Batzuetan, ikasle gehienak edo asko behintzat, oinez joaten dira eskolara, beste batzuetan, ordea, autobusa erabiltzen dute gehiago. Horren arabera, ikastetxe batzuk parte hartzen dute egitasmoan eta beste batzuk ez. Izena ematen duten familiek gogo onez hartzen dute egitasmoa. Beste batzuk, berriz, nahiago izaten dute rutinarik ez aldatzea eta aldez aurretik antolatuta daukaten moduarekin jarraitzea.

Nola joaten dira gaur egun haurrak eskolara Arrasaten? badago tendentziarik?

Guk uste dugu kokapenagatik, eskola etxetik nahiko hurbil daukaten ikasle gehienak oinez joaten direla. Beste batzuetan, urrutiago geratzen diren eskoletan eta oinez iristea deserosoagoa den kasuetan, autobusa erabiltzen da gehiago. Egia da, kasu askotan gurasoek autoa ere erabiltzen dutela erraztasunagatik edo. Batzuetan egoten dira auto mugimendu nahiko handiak eskola sarrera eta irteera orduetan, eta uste dugu oro har, ez dagoela kontzientzia handirik egoera horiek sortzen duten arriskuez eta eraginez.

Zeintzuk dira zuen ustez haurrak eskolara oinez ez joatearen arrazoi nagusiak?

Guk uste dugu, batzuetan,  haurrak txikiak direnean eta eskolara joateko gurasoen laguntza behar dutenean, gurasoen erosotasunagatik edo beharragatik, askotan autoa edo autobusa erabiltzen dela. Beste batzuetan, eskola urruti egotea da arrazoia. Egia da, Arrasaten, badaudela eskola batzuk erdigunetik urrun samar daudenak eta horrek ere errazten du oinez ez joatea.

Zeintzuk dira ikastetxera oinez joateak dituen onurak?

Osasuntsua eta iraunkorra da. Ez du kutsatzen.  Ariketa fisikoa egiten duzu. Merkea da eta herria edo auzoa ezagutzen duzu. Lagun artean joan zaitezke eta horrek ere eskolako bidea bihurtu dezake sozializatzeko eta harremanak estutzeko momentu polit batean.  Gainera, komunitaterako ere badiru onurak, eskola ingurua seguruagoa bihurtzen delako, motordun ibilgailuen joan etorriek sortzen duten arriskutik libre.

Zer behar du herri batek haurren mugikortasun seguru eta autonomoa ahalbidetzeko?

Batez ere, bide eta  eremu seguruak ziurtatzea. Herri barruan oinez mugitzea erraza, erosoa eta segurua izatea eta horrek dituen abantaila guztietan sinestea, noski.