Badira urte batzuk antzerako egitasmoak bultzatzeko lanean dihardutela hainbat herritan. Oinez edo bizikletan diogunean patinetan, patinetean edo motorrik gabeko edozein garraio sistemari buruz ari gara, noski.

Ia egunero egiten den eskolarako bidea modu horretan egiteak hainbat onura ditu: neska-mutikoen autonomia maila handitzen da, arduratsuagoak izaten ikasten dute, jarduera fisikoa egitea eragiten du, bizi ohitura osasuntsuak barneratzen laguntzen du… Eta noski, ingurumenarekiko praktika jasangarria da.

Gurean ere gero eta zabalduago daude izaera honetako egitasmoak. Leku batzuetan lehenago hasi ziren, beste batzuetan herriaren orografiak gehiago laguntzen du…, baina esan beharra dago bizi dugun pandemia egoera honetan abantaila berriak eta oso garrantzitsuak onartu behar zaizkiola: izan ere, aire zabalean, distantziak bermatuz eta jende pilaketak saihestuz egin daiteke.

Hilaren 16tik martxan da Europako Mugikortasun Iraunkorraren Astea, eta Arrasaten, esaterako, aukera baliatu dute Eskolara Oinez ekimena martxan jartzeko. Hala, Arrasateko Udalak Arrasate Herri Eskolako ikasle eta irakasle guztiak motordun ibilgailuak alde batera utzi eta eskolara oinez edo bizikletan joatera animatu ditu. Mugikortasun Asteko ekimen nagusia da, gainera. “Aurtengoa urte berezia ari da izaten. COVID-19ak izugarri eragin digu alor guztietan; baita mugikortasunean ere. Konturatu ginen konfinamendu garaian zein mailako altxorra den mugikortasun aske eta jasangarria”, nabarmendu du Edurne Unamuno zinegotziak.

Bi ibilbide eskolara

Arrasate Herri Eskolako Lehen Hezkuntzako laugarren, bosgarren eta seigarren mailetako ikasleek hartuko dute parte ekimenean. Egunotan Ingurumen Eskolako irakasleek gidatuko dituzte umeak eskolaraino iritsiko diren bi ibilbideetan: bata Biteritik irtengo da eta bestea, Kurtzetxiki plazatik. Zure herrian badaude antzerako ekimenak? Data jakin batzuetan edo ikasturte osoan zehar? Nola antolatu zarete?

Egitasmo sinple eta txiki hauen atzean dagoen eraldaketa asmo sakona

Eskola bidea ekimenekin, haurrak eskolara bakarrik eta oinez joatea sustatu eta erraztu nahi da. Hau da, helburua helduen laguntzarik gabe eta bide seguru batetik, haurrak eskolara bakarrik joatea da. Modu autonomo, osasungarri, seguru eta garapen iraunkor bat bultzatuz.


Azken hamarkadetan ordura arte horren ohikoa zena arraro bihurtu da: haurrak beraien herriak oinez zeharkatzea jolasteko, ikasteko edo lagunekin elkartzeko guneetara iristeko. Azken urteetan gure herri eta auzoetan, oinezkoen mugikortasuna baino kotxeen mugikortasuna lehenetsi da. Herriak kotxeek hartu dituzte eta beraientzat pentsatuta moldatu dira, guzti hau helduen mugikortasun behar edo nahiei erantzunez noski. Helduaren mesedetara diseinatutako mugikortasun eredu honek baina, zuzen zuzenean eragin du heldu hauen haurren eta zaharren mugikortasun autonomorako aukeretan, berau baldintzatu eta kasu askotan deuseztatzeraino.

Honetaz hizt egin genuen Amaia Etxaberekin, egitasmo sinple eta txiki hauen atzean dagoen eraldaketa asmo sakonaz.