Eskolako fobia haurrak eskolara joateko duen ezintasunari dagokio, eskolako egoera edo alderdiren bati beldur irrazionala diolako. Gainerako fobiekin gertatzen den bezala, ez du kategoria diagnostiko propiorik DSM5ean, ( buruko nahasmendu guztiak biltzen dituen eskuliburua). Hala ere, badira identifikatzen lagun dezaketen ezaugarri batzuk:

  • Eskola fobian alterazio emozional garrantzitsuak izaten dira, hala nola beldur bizia, umore txar eztandak, edo eskolara joateko unea hurbiltzen denean gaixotzea edo sintomak izatea.
  • Haurrak ihes egiteko edo eakola saihesteko jokabideak izango ditu: eskola-testuinguruaren aurreko ondoez emozionalaren ondorioz, absentismo-aldi luzeak gertatzen dira.
  • Eskolako fobiaren kasuetan, gurasoek badakite zein diren huts egiteak , eta kezkatuta daude eskolara joango direla ziurtatzeko; horrek bereizi egiten ditu eskolako fobia eta “piper egitea” edo arduragabekeria-kasuengandik.

Eskolara joatean edo joateko unea iritsi baino lehentxeago sor daiteke haurraren ondoeza, gauean edo eskolako unea hurbildu ahala sintomak areagotuz. Ondoez emozionalaren sintomekin batera (antsietatea edo beldurra, batez ere), sintoma fisikoak ere ager daitezke, hala nola goragalea, oka egitea, beherakoa, tripako edo buruko mina, besteak beste. Sintoma horiek, fisikoak eta emozionalak, eskolara joatea eragozten saiatzen dira. Zenbat eta handiagoa izan (lehen hezkuntzatik aurrera), orduan eta aukera gehiago dago sentitzen duen antsietatea edo beldurra identifikatzeko, baina haur txikiagoetan ez da ohikoa eta izaten.

Arazoaren hasiera mailakatua izan daiteke, pixkanaka-pixkanaka ohikoagoak bihurtzen diren eskolara joateari buruzko kexa gero eta indartsuagoekin, edo bat-batean ere has daiteke, aldez aurreko sintomarik gabe eskolara joateari uko egiten zaionean. Haur txikiagoetan ohikoagoa izaten da bat-batean hastea, eta helduagoetan, berriz, progresiboagoa. Askotan, eskolako fobiaren hasierak bat egiten du oporrengatik edo gaixotasunagatik epe luzez ikastetxera ez joan izanarekin, ikastetxez aldatzearekin edo beste bizi-gertaera estresagarri batzuekin.

Eskola fobia eta gurasoengandik bereizteko antsietatea ez dira gauza bera, baina nahastu egin daitezke. Haur batzuek eskolako fobia izan dezakete, baina ez dute gurasoengandik bereizteko zailtasunik. Eta haur batzuek banantzeko antsietatea izan dezakete, baina, egokitze-aldiaren ondoren, ez dute aparteko zailtasunik eskolara joateko. Ikastetxean beste pertsona batzuekin lotzea lortu dutenean, segurtasuna ere ematen baitiote.

Eskolako fobia gainditzeko, psikologiako profesionalen laguntza behar izaten da, kasua ebaluatzeko eta, ikastetxearekin eta pediatrarekin koordinatuta (kasu batzuetan tratamendu farmakologikoa beharrezkoa izan daiteke), esku-hartze bat planifikatzeko.

Artikuluaren iturria: