Emakunderen Nahiko! programaren barruan irakasleei zuzendutako topaketa egin du Ibai Fresnedok. Ikasle mutil berdinzaleak hezteko erronka izan du izenburua, eta Zoom bitartez egin dute.

Eskoletan maskulinitate eredu berriak lantzea ezinbestekotzat jotzen du eta bide horretan dauden erronka berriak aztertzen dihardu azken urteotan. Maskulinotasun berria ardatz hartuta estereotipoak saihesteko eta berdintasunean aurrera egiteko jarraibideak jaso dituzte irakasleek gaur egindako saioan.

Ibai Fresnedok, bere hitzaldian, eskolan kokatu du maskulinitatearen kontzeptua eta nagusi den ereduarekin lotutako rolak eta jokabideak errepasatu ditu. Maskulinitate berrietan aditua denak gizartean onargarriak diren eta eskola-jazarpen kasuak ekar ditzaketen faktoreak zalantzan jartzeko eskolak duen zeregina ere aztertu du. Horregatik, Fresnedok eskolaren programa pedagogikoaren barruan har daitezkeen estrategia batzuk diseinatu ditu, eta eraldaketa positiboa planteatzeko ikastetxe bakoitzean ematen diren maskulinitateak ikusaraztera animatu ditu hezitzaileak.

Besteak beste mutilen desboteretzearen inguruan aritu da, eta hainbat behar azpimarratu ditu:

  • Ahalduntzeari eta zaurgarritasunari erreferentzia zuzena egitearen beharra.
  • Mutilen prozesu indibidualak zein kolektiboak abiatzearen beharra.
  • Eskolen baitako hainbat logika eta dinamika apurtzeko beharra.
  • Deserosotasuna eraldatzeko tresnak planteatzeko eta kudeatzeko beharra.

Zer da Nahiko! programa

Emakundek 2003an jarri zuen martxan Nahiko! programa. Lehen Hezkuntzarako programa da eta berdintasunean, errespetuan eta indarkeriarik ezan oinarritutako emakumeen aurkako indarkeriari aurrea hartzeko hezkidetza-programa bat da. ikastetxeetako ikasle eta irakasleekin nahiz horien familiekin lan egiten du hezkidetzaren bitartez.

Gida ere badu Nahiko! programak eta orain arte izandako esperientzia-urte hauek eragin dituzten ondorioak laburbiltzen dira bertan. Proposamen oso bat dago prestatua urte hauetan guztietan zehar ikastetxeetako irakasleekin eta ikasleekin batera egindako esperimentazio praktikoetatik eratorria. Lehen Hezkuntzako ziklo guztietan esku hartzeko proposamena da. Hain zuzen ere, 18 unitate didaktiko ditu –sei ziklo bakoitzerako. Hala, ipuinak, jolasak eta koadernoak daude.