Kaleidoskopioa; bere barnean irudiak simetrikoki biderkatuta ikusten diren objektua. Ikasiko dugu bat egiten? Goazen ba!

Materiala:

  • Paper zuria
  • Kartoia
  • Aluminio papera
  • Kartoizko tutua
  • Zeloa
  • Artaziak
  • Kola
  • Rotulkiak
  1. Hasteko, Kaleidoskopioaren euskarria izango den kartoizko tutua apainduko dugu.
  2. Jarraian, paper zuri batean borobil bat marraztuko dugu. Borobil honen neurria gure tutuarena baino handiagoa izan beharko da, gutxienez bikoitza. Guk zelo baten laguntzarekin marraztu dugu borobila. Borobila marraztu ondoren, moztu egingo dugu eta jarraian zulotxo bat egingo diogu erdian. Bukatzeko, bertan kolore ezberdinetako marrazkiak egingo ditugu, hauek erditik hasi eta kanpoaldera marraztu beharko dira.
  3. Kaleidoskopioaren ispiluak egiteko aluminio papera erabiliko dugu, horretarako, kartoi zati batean aluminio papera itsatsiko dugu. Gogoratu berau ondo itsasteaz. Jarraian hiruki forma emango diogu eta zelo  zati batekin eutsiko dugu, ostean tutu barruan sartuko dugu.
  4. Amaitzeko, tutuari makiltxo bat itsatsiko diogu eta makilaren puntan marrazkiekin osatutako borobila txertatuko dugu.
  5. Listo, kaleidoskopioa prest! Garrantzitsua da berau erabiltzerakoan toki argitsu batean egitea, argia behar baitu ondo funtzionatzeko.