Udaberriarekin batera egun eguzkitsu eta beroak ere gertuago dauzkagu eta guri uretan jolastu eta bainatzeko gogoa piztu zaigu. Horregatik, gaurkoan, egurrezko makiltxoak oinarri harturik, uretan jolasteko txalupa egiten erakutsiko dizuegu!

Materiala:

  • Egurrezko makilatxoak
  • Artaziak
  • Silikona
  • Gomak

PAUSUAK

  1. Hasteko, makiltxoak zatitu beharko ditugu. Horretarako jarri arreta argazkian. Makil zati gehienen neurriak gutxi gora beherakoak izan daitezkeen arren, batzuetan txaluparen zabalera kontuan izan beharko dugu, alboz albo doazen zatiak edota txaluparen motorra izango direnak mozterakoan esaterako. Azken hauei erdian mozketa bana egin beharko zaie.
  2. Behin makil zatiak prest ditugula, txalupa muntatzea besterik ez zaigu geratuko. Silikona erabiliz makiltxoak beraien artean itsatsiko ditugu.
  3. Bukatzeko, gure txalupa azkarrago mugitu dadin, motorra jarriko diogu. Horretarako mozketa bana duten bi makil zatiak bata bestearekin lotuko ditugu.
  4. Jarraian, txaluparen erdiko aldean geratu zaizkigun zulotxoetatik goma bat sartuko dugu, tartean txaluparen motorra gehituz.
  5. Txalupari nortasun handiagoa emateko, berau apaindu ere egin daiteke. Apaintzerako orduan kontuan izan txalupa uretan bustiko dela.
  6. Gogoratu, txalupa uretan azkarrago mugitu dadin, motorra atzeraka biratu beharko dugula. Zenbat eta buelta gehiago eman, orduan eta urrunago iritsiko da itsasontzia.
  7. Bukatzeko, makiltxoak errazago moztu ahal izateko, jarraian trikimailu txiki bat: sartu makiltxoak ur berotan bigundu arte, horrela errazago moztu ahal izango dituzu.