Gaur egungo haur parkeekin kritiko dira adituak, besteak beste, haurren benetako beharrak ez dituztelako kontuan hartzen, eta intimitatean nahiz askatasunez ibiltzeko aukerarik ez dietelako ematen. Beste parke eredu bat aldarrikatzen dute.
Hik Hasi aldizkarian landu dute gaia, besteak beste, Txusma Azkona eta Alfredo Hoyuelos Lizarrako eta Iruñeko haur-eskoletako aholkulariek publikatutako Parkeak bizitzeko modu berriak izeneko liburuxka oinarri hartuta.
Bertan azaltzen da gaur egungo haur-parkeak ez daudela haurrentzat diseinatuta, helduen ziurtasunerako baizik. Haurrek ez dute intimitatean eta askatasunez esperimentatzeko aukerarik. Jolasik gehienak oso zuzenduta daude eta guzti-guztia erabat kontrolpean egon ohi da.
Gurasoen beldurra
“Ezin da gurasoen beldurra ukatu eta existituko ez balitz bezala jokatu, baina beldur hori helduak landu beharko luke eta ez haurrengan proiektatu”, azaltzen du Azkonak. Lehen ez zegoen parkerik. Plaza zegoen, zelaia, basoa, kalea… Herrian jolasten ziren haurrak. Adituek aldarrikatzen dute haurrak jolasa modu libre batean bizitzeko eremuak behar dituela eta bere gaitasunak garatzeko aukerak eskaini behar zaizkiola.
Hala, aholkatzen dute:
. haur-parkeek aldapak, mendixkak, sakonuneak… edukitzeko
. irudimena bultzatzeko eta arriskua bizitzeko aukera emango duten eraikuntzak eskaintzeko.
. haurrei intimitaterako tokiak ahalbidetzeko.
. naturako elementuak edo material errealak erabiltzeko (harea, enborrak, ura, lurra, adarrak…)
Hik Hasiren artikulua osorik hemen.
Iruzkinik ez "Esperimentatzen uzten duten jolasguneak behar dituzte haurrek"