Datorren ikasturtean musika eskolan instrumentua aukeratu behar duten Oñatiko Jose de Azpiazu musika eskolako hamasei gaztetxok herriko musika bandaren azken kontzertua ‘zero aulkitik’ jarraitu ahal izan dute; aurretik, zuzendariak halako talde bateko instrumentu guztien ezaugarriak azaldu dizkie.

Domekan, Zinemaldia izeneko kontzertua eskaini zuen Oñatiko musika bandak, Zubikoa kiroldegian. Pelikula ezagunetako soinu bandak izan zituen ardatz, baina, zuzenekoa hasi aurretik, beste protagonista batzuk egon ziren han. Protagonista txikiagoak: Jose de Azpiazu musika eskolako hamasei ikasle.

Zehazki esateko, 6 eta 7 urteko neska-mutikoak izan ziren, eta, irailean hasiko duten ikasturtean, musika instrumentu bat aukeratu beharko dute. Batzuek oso garbi dute zein aukeratu, baina gehienek, ez. Eta, zalantza horiek argitzen laguntzeko, bandako kideekin egoteko aukera izan zuten.

Instrumentuak ezagutuz

Aitor Biain- Bidarte bandako zuzendaria izan zuten bidelagun eta xehetasun ugari kontatu zizkien gaztetxoei: musika banda baten dauden instrumentu familiak zeintzuk diren, instrumentu bakoitzaren ezaugarriak eta soinuak nolakoak diren, instrumentu berberak zenbat aldaera izan ahal dituen, soinua ateratzeko instrumentuak ahoan sartzeko zein elementu dituen…

Hori guztia kontatu ostean, instrumentu familia bakoitzak kantu batean zein garrantzi duen azaldu zien, eta, familiaka, Star Wars pelikularen soinu bandako zati bat jo zieten bandako musikariek ikasleei.

Kontzertua, barrutik

Azalpen guztiak entzun eta gero, kontzertuaren unea heldu zen eta musika eskolako ikasleek bandako musikarien ondoan jarraitzeko pribilegioa izan zuten. Aurrez aukeratu zuten zein instrumenturen ondoan egon gura zuten, eta aulki horietatik jarraitu zuten zuzenekoa.

Behean, bertan egon ziren hiru ikasleren iritziak.