Familiaren babesak onura akademiko eta afektiboak dakartza ikaslearentzat.
Eskolak agindu, baina etxean egin behar dira etxeko lanak, eta sarri gatazka iturri dira familietan. Horrela irakurri dugu Hik Hasi aldizkariak argitaratu berri duen artikuluan. Izan ere, famili askok uste du ez dutela seme-albei laguntzeko gaitasunik. Dena den, gurasoek, irakasgaietan sartu gabe, ikasten ikasteko prozesuan lagun dezakete.
Joxe Amiama EHUko irakasleak DBHko etxeko lanen inguruan egindako doktore tesian ondorioztatu duenez, gai estresagarria izan beharrean, ahulgunea lirudikeena indargune bihur daiteke. Amiamak etxeko lanak familiaren eta eskolaren arteko harremanak indartzeko baliabide gisa planteatzen ditu, bi guneak ukitzen dituen gaia baita. Izan ere, familiak etxeko lanetan laguntzeak mesede egiten die seme-alaben eskola-errendimenduari, gurasoen eta seme-alaben arteko komunikazioari eta eskolaren eta familiaren arteko harremanari.
Familia etxeko lanetan presente egoteak sortzen dituen onurei dagokienez, akademikoak, ohiturazkoak eta afektiboak aipatzen ditu Amiamaren tesiak.
Ikasten ikasten lagundu
Familia asko, ordea, ez dira gai sentitzen euren seme-alabei etxeko lanekin laguntzeko, edukiak ez dituztelako ezagutzen. Hala ere, edukiei lotutakoez gain, badira familiek eskain ditzaketen zenbait jarraibide. Batetik, ikaste ohiturak hobetzen lagun diezaiekete ikasleei, denbora antolakuntzan edota ardurak hartzen. Bestetik, alderdi emozionalari begira, seme-alabak motibatzea, sentimenduak kudeatzen irakastea eta haien ahalegina baloratzea gomendatzen ditu Amiamak. Horrez gain, “laguntza eta motibazioa kontrolarekin eta presioarekin ez nahastea ezinbestekoa” dela azpimarratzen du bere tesian.
Eztabaida birplanteatzea
Bere tesian dioenez, komunikabideek ateratzen duten eztabaida “etxeko lanak bai ala ez” izan ohi da, baina Amiamaren arabera, hori ez da eztabaidaren muina. Horren ordez, pentsatu beharrekoa da “etxeko lanak nolakoak, zenbat eta zertarako” izango diren, DBHko esparruan etxeko lanak ez baitira zalantzan jartzen.
Albistearen iturria Hazi Hezi.
Argazkiaren iturria hemen.