Kataluniako bi gurasok sortu dute mugimendua, eta leku gehiagotara zabaltzea proposatzen dute.

Captura de pantalla 2014-12-16 a las 12.37.53

Marta Ros eta Sarah Rink guraso dira, eta aspertuta zeuden egunero nork bere umearen jostailuak parkera jaisten eta arratsalde amaieran batzen. Hala, Social Toy mugimendua martxan jartzea pentsatu zuten. Bartzelonako Gracia auzoko parkeko gainerako gurasoekin hitzegin eta parkekoak izango ziren jostailuen kutxa sortu zuten. Jostailuak guztiek erabiltzeko dira eta eguna amaitzen denean kutxan jaso eta bertan gelditzen dira.

Parkekoak direla adieraziz oharrak dituzte jostailuek eta horrek ez du kentzen umeek etxetik nork bere jostailuak eramatea. Gertatu da parkeko jostailuak desagertzea, baina apurka apurka familiak ari dira ekimenaren filosofiaz jabetzen. Inguruko beste zenbait parketan ere ipini dute martxan ekimen berdina.

Ekimenak elkarbanatzen, besteekiko errespetua, gune publikoekiko errespetua eta kontsumo arduratsua bultzatzen dituela adierazten dute Rosek eta Rinkek.

Social Toy mugimendua zer den azaltzen duen atari digitala martxan da (hemen). Bertan ekimen honetara atxiki diren parkeen kokapena, funtzionamendua eta ekimena martxan jartzeko esku-orria aurki daitezke.