Familia guztiak desberdinak dira, eta bakoitzak bere balio sistema transmititzen du. Hori horrela izanda argi eduki behar dugu familia dela ume batek duen garantia bakarra. Gurasoak zein erreferentziazko beste heldu batzuk izan umearekin bizi direnak haurrak baldintzarik gabeko onarpena sentitu behar du familiarengandik. Garrantzi biziko kontua da bere garapen egokirako. Lagunen onarpena garrantzitsua bada, zer esanik ez familiarena!

Gure seme-alabak ez dira leku guztietan onartuak izango. Nahiko genuke, baina jarrera ezkorrak eta bazterketa egoerak izango dituzte bizitzan. Garrantzitsua da, une horietan, etxekoen onarpena guztiz finkatuta izatea. Babesleku garrantzitsua da familia, eta ezinbestekoa umeak oreka mantentzeko nahitaez bizitzea suertatuko zaizkion une korapilatsu horietan.

Umeak onarpen horren inguruko zalantza badu, esate baterako, haserretzen garenean berarekiko jarrera edo hitz desegokiak ditugulako –askotan gerora damua eragiten dizkiguten jarrerak eta hitzak– etxetik kanpora ematen diren bazterketa egoeretan arazoak izan ditzake, eta horrekin batera auto-estima arazoak. Hala, familiako helduek segurtasuna eman behar dugu.

Harrotasuna adierazi
Umeak sentitu behar du bere familia harro dagoela berarekin. Argi izan behar du egiten dituenak eginda ere familia ez dela sekula beraz lotsatuko. Lotsatuko da, akaso, uneren batean egiten dituenekin, baina inoiz ere ez bere pertsonaz.

Hurbiltasuna erakutsi
Ez gaude beti gure seme-alabekin baina sentitu behar dute beharrezkoa den guztietan astia dugula beraientzako. Noski, presentzia fisikoa ezin da uneorokoa izan baina umeak jakin behar du behar badu hor egongo garela eta edozein unetan jo dezakeela gurasoengana.

Kontuz babes eske etortzen zaizkigunean: ez ditugu epaitu behar. Gehienetan kontatzera bakarrik etortzen dira, eta barrenak askatzea besterik ez dute behar. Gure lana entzutea da. Kosta egiten bazaigu ere kontrolatu behar dugu gomendioak emateko dugun ohitura edo premia handi hori.

Ulerkortasunez jokatu
Seme-alabek kontraesanak dituzte, baina guk ere bai. Sarri gertatzen zaigu nekearen, haserrearen edo egoeraren arabera gauza kontrajarriak esatea seme-alabei. Edo ez? Errezeta magikoa pazientzia da. Pazientziaz jokatzen badugu dena hobeto doa: lasaiago hartzen ditugu gauzak, gatazkei azkarrago ematen diegu buelta eta lehenago aurkitzen dugu konponbidea.

Jakin badakigu umeek gure arreta eskatzen dutela, eta noiz jasotzen dute gehien? Egoki jokatzen dutenean edo gaizki jokatzen dutenean? Lasai-lasai marrazten daudenean mila gauza egiteko baliatzen dugu denbora. Zerbait puskatzen dutenean, ordea, zuzenean joaten gara beraiengana… Ulertzekoa da, beraz, jarrera ez egokien atzean, sarri, arreta lortzeko helburua egotea. Hausnarketarako gaia da zalantzarik gabe.

Konfiantza eman
Sinistu behar dugu gure umea gai dela gauzak egiteko. Ez badugu konfiantza hori alferrik saiatuko da. Ez dago ume bati nagia dela esatea bezalakorik nagia izatera kondenatzeko. Ia automatikoa da, eta nekez askatuko da etiketa horretatik. Berdina gertatzen da beste edozein ezaugarrirekin.

Maite ditugula adierazi
Topiko bat dirudi baina garrantzitsua da neska-mutikoei maite ditugula esatea, eta beraiek hori horrela dela benetan sentitzea. Umeak du zalantza izpirik eduki behar. Nola sortzen dira zalantzak? Badirudi gero eta egokiago jokatzen dutenean gehiago maite ditugula. Hori da ume baten ikuspegia, horrela bizi dute gauza: izan ere, batzuetan modu oso txarrean jartzen gara. Une horietan egiten eta esaten ditugunak oso garrantzitsuak dira. Gure erreakzioetatik umeak uler dezake ez dugula hainbeste maite.

Oso ohikoa da haserrealdi baten ostea umeak musu edo besarkada bat eskatzea. Gu oraindik haserre egonda ere hurbilduko zaigu laztan eske. Ez da erraza, baina une horietan gai izan behar dugu haserrea eta maitasuna ezberdintzeko. Nola jakingo dugu umeak ez duela gure maitasunaren inguruko zalantzarik? Ariketa hori egitea lortzen dugunean.

Umea etor daiteke limurkeriatan edo gaizki egin izanagatik ipinitako ondorioa kentzeko helburuarekin, baina gu gara helduak eta ume bati ez genioke inoiz maitasuna ukatu behar.
Besarkada bat edo musu bat emanda ere haserre jarrai dezakegu. Azken finean, onartzen ez duguna bere jokaera bat da, ez bera. Eta hori adierazi behar diogu.

Ondorio bat jarri badiogu ondorioarekin jarraituko du eta ez diogu egindakoa onartuko baina egindakoak eginda ere umeak argi eduki behar dute beti maite dugula.

Garrantzitsua da bere garapenerako eta ezbairik gabe etxetik kanpora izango dituen harremanetarako.

Argazkiaren iturria hemen.