Euskadiko Orkestraren hezkuntza- eta gizarte-zikloa indartsu dator 2024-2025 ikasturtean eta inoiz baino jarduera gehiagorekin: 70 baino gehiago. Inklusiboa ere izango da; izan ere, jarduera horietako askotan planteamendu transbertsala txertatu du. Orkestra inklusio sozialerako tresna izateko hainbat formaturen aldeko apustua egin dute.

Zikloak lau ekoizpen propio estreinatuko ditu: Ilargiari kantari, Musika tantak, Logelan logale eta Misterioa. Aste honetako ikuskizunak, esaterako, 3.300 ikasleren bisita izango du.

Orkestraren programazioan aspaldidanik erabat sustraituta dagoen hezkuntza-ziklo hau herritarrei, oro har, eta gazteei, bereziki, musika gerturatzeko helburuarekin jaio zen. Aurten, zikloak arreta berezia eskaintzen dio gizarteko sektore zaurgarrienari.

Kolektibo zaurgarrien inklusioa eta kulturarako irisgarritasuna sustatzeko helburuarekin, ekintza ugari txertatu dira Musika Gelaren ziklo berrian. Alde batetik, aurten aurkeztuko diren ekoizpen propio batzuk alderdi hori modu integral eta transbertsalean txertatzeko ideiarekin sortu dira.

Bestetik, Euskadiko Orkestrak FEVASekin duela hamarkada bat baino gehiagotik partekatzen dituen musika-tailer inklusiboak denboraldi honetan zabalduko dira berriz. Orain, ekimen zentralagoa, sendoagoa eta zabalagoa izango da. Musikazaleak izenarekin bataiatu dute.

Azkenik, Musika Gela Europako ARTIS+ proiektuaren eta Gertu Kultura programatzaile-sarearen parte da ikasturte honetatik aurrera. Ekimen horien helburua da pertsona zaurgarrien kulturarako irisgarritasuna hobetzea.

Argibide gehiago eta sarrerak hemen.