Maiatzaren 15etik 25era egitekoa den Euskaraldian parte hartzeko oinarrizko baldintzak euskara ulertzea eta 16 urtetik gora izatea dira. Baina, 16 urte azpiko herritar gazteek ere zeresan itzela dute euskararen biziberritzean, orokorrean; eta erabileran, bereziki. “Euskal Herriko gaztetxoek egiteko garrantzitsuak dituzte Euskaraldian, bai ariketa bitartean eta baita aurretik ere. Etorkizuneko parte-hartzaileak izateaz gain, euren etxeetan erabileran aldeko ezinbesteko pedagogia egin dezakete, ariketaren nondik norakoak azalduz, eta Euskaraldiak proposatzen duena etxeetan egitera animatuz -lehen hitza euskaraz egin, eta elkarrizketa elebidunak mantentzea sustatuz-“, esan du Euskaraldiko koordinatzaile Goiatz Urkijok.

“Xaxatzaile” izateko deia

Goiatz Urkijoren hitzetan “Euskaraldiaren xaxatzaileak” izango dira gaztetxoak, “akuilua erabiliz etxeetan erabileraren aldeko deia egingo dutenak”. Izan ere, etxe askotan euskararen berri haur eta nerabe horien eskutik etortzen da soilik.

Lan horretan trebatzeko material didaktikoa prestatu dute Euskaraldiko lantaldeak Ikastolen Elkarteko kideekin batera. Euskal Herriko ikastetxe guztietara bidaliko dute.

Informazio gehiago: www.euskaraldia.eus