Euskal Herriko umeek zein gazteek egindako ehunka elkartasun mezu Mundubat elkartearen eskuetan utzi ditu Gure Haurrak Ere Badira egitasmoak.

Iazko azaroaren 30a eta aurtengo urtarrilaren 31 bitartean, Euskal Herriko umeek zein nerabeek Palestinako beraien adinkideentzat sortutako elkartasun mezuak jaso ditu elkarteak bere helbide elektronikoaren bidez. 

“Mota guztietako mezuak dira Euskal Herriko hamaika ikastetxetatik zein etxeetatik bidalitakoak: marrazkiak, gutunak, ordenagailuz egindako irudiak, olerkiak zein bertsoak, bideoak eta abestiren bat ere bai. X sarean eskegi ditugu mezu guztiak, hari erraldoi batean, eta denak daude ikusgai lotura honetan“.

Mezu guztiak Palestinaraino heltzea dute orain helburu, “ume palestinarrek zuzenean jaso eta senti dezaten euskal ume zein nerabeen elkartasuna”. Bi bide erabiliko dituzte: Ingalaterran dagoen eta mundu zabaleko elkartasun mezuak biltzen dituen “Letters for Palestinian childhoods” elkartearen bidez eta Mundubat euskal elkartearen bidez.

Mezu horiekin guztiekin batera, elkarteko kide Mitxel Elortzak Euskal Herriko umeek Palestinan gertatzen ari dena uler dezaten idatzitako “Askatasun doinua” ipuina ere bidaliko dute –arabierara itzulita– ume palestinarrek ere lan hori ezagutu dezaten.

Gure Haurrak Ere Badira egitasmoa 2023ko urrian sortu zen Euskal Herriko zenbait txokotan martxan jarri zen iniziatiba ezberdinen bidez, eta 2024ko apirilean Euskal Herri mailan hedatu zuten EHko hainbat gurasok eta hezkuntza arloan lan egiten duten hainbat langilek, Palestinan gertatzen ari denak hunkituta eta, oso bereziki, hango haurrak eta nerabeak pairatzen ari diren sarraskia ikusita. “Gure haurrak ere badira” manifestua ere sortu zuten.

“Ugariak eta askotarikoak dira manifestua babestu dutenak, hala nola Euskal Herri osoko 200 ikastetxetako guraso elkarteak, Euskal Herriko Ikastolen Elkartea, EHIGE –Euskal Herriko Ikasleen Guraso Elkartea – eta ELA, LAB, STEILAS, CCOO, UGT eta CNT sindikatuak. Orduz geroztik, hainbat egitasmo gauzatu ditugu: Euskal Herriko ikastetxeetako patioetan egindako kontzentrazioak
edota iazko abenduaren 4an Gasteizko parlamentuko Justizia eta Giza Eskubideen Batzordean egindako agerraldia, besteak beste”.