Uztailaren 1ean emango diote hasiera EuskarAbenturaren zazpigarren espedizioari. Euskal Herriko zein diasporako 16 eta 17 urte arteko 127 gaztek zeharkatuko dute hilabetez Euskararen Lurraldea. Motxila bizkarrean, 400 kilometro egingo dituzte oinez zazpi probintziak zeharkatuz.

Mauletik abiatu izan da beti EuskarAbentura, baina aurten Atharratze izango du irteera puntua. Parte hartzaileak, arduradunak eta harrera-egileak prest dira.

“Espedizioak sortzen duen burbuilarekin, ekarpen positibo bat egin nahi zaio gazteen sozializazio eta identitate eraikuntzari”, adierazi du komunikazio arduradun Haizea Solagurenbeaskoak.

“Irteten zara zure etxetik motxila batekin non bi kamiseta eta bi praka sartu dituzun eta sekulako hilabetea pasatzen duzu. Sekulako jendea ezagutzen duzu eta Euskal Herri osoko lagun oso onak egiten
dituzu”, gehitu du esperientzia parte hartzaile modura zein monitore modura ezagutzen duen Noa Anduezak.