Hurbiltzen proiektuaren barruan hainbat egitasmo sortu dituzte Euskaltzaleen Topaguneak eta Asmoz Fundazioak. Azaldu dutenez, asmoa euskaratik gertu eta urrun dauden familien arteko “elkar ezagutza sustatzea” da, eta baita kultura, ohitura edota erlijio ezberdinen aitormena egitea ere, besteak beste. Finean, uste dute haurren bitartez, gurasoen euskararekiko motibazioan eragin daitekeela. 

Euskara partekatzeko eta euskal kulturara hurbiltzeko aukera ematen duen proiektua bezala aurkeztu dute Hurbiltzen, eta familien arteko hizkuntza-aniztasuna “elkarri aitortzeko” ere balio duela diote. “Hurbiltzen proiektu honek euskarazko harrera bultzatu nahi du, berdinen arteko harremana oinarri hartuta”, azaldu dute sustatzaileek.

Proiektu pilotua azaroan eta abenduan garatzen ari dela adierazi dute; hain zuzen ere, hilean behin, izena ematen duten familiak dinamizatzaile batekin bilduko dira, eta elkarrekin, jolasak egingo dituzte saio gidatu batean. Antolatzaileek azpimarratu nahi izan dute, saio horietan, indarrean dauden higiene- eta segurtasun-neurri guztiak beteko direla.

Proiektuaren helburuaz galdetuta, Mattin Solis Asmoz elkarteko kideak azaldu du familiak “hurbiltzen” saiatuko direla, bakoitzaren kulturak eta hizkuntzak partekatuz: “Topaketa informaletan, euskara etxean erabiltzen ez duten familiei lagundu nahi zaie, euren seme-alabek hizkuntza hori beste ingurune batean praktikatzeko aukera izan dezaten eta, horrela, gurasoak ere hizkuntza horretara eta gure herriko ohituretara hurbiltzeko. Prozesu osoan zehar, gure aholkularitza eta laguntza izango dute, sor daitekeen edozein zalantzaren aurrean”. 

Bestetik, nabarmendu dute bost eta hamar urte bitarteko haurrak dituzten familiak gutxienez astean behin elkartuko direla (bakoitzaren konpromisoaren eta egoera pertsonalaren arabera, ordutegi bateragarriak adostuko dituzte), eta, aipatu bezala, antolatzaileek bideratuko dituztela aurkezpenak, lehenengo harremanak, eta baita geroko jarraipenak ere. “Topaketa horiek informalak izango dira, izan daiteke familiak auzoko parkean ordubetez elkartzea, edo buelta bat ematea, edo agian kafe bat hartzea, seme-alabek harremanak euskaraz egiten dituzten bitartean”, azaldu dute. Familietako helduen artean, eskolako gaiekin eta hizkuntza-zailtasunak dituzten eguneroko gaiekin laguntzea da proposatzen den aukeretako bat.

Antolatzaileen esanetan, une honetan familien poltsa osatzen ari dira, eta izen emate epea azaroaren 15era artekoa da. Halere, esan dute, agian, bizi dugun egoeraren ondorioz, gehiago luzatuko dutela: “Hitzaldietan izena emateko, 672 64 88 04 zenbakia ahalbidetu dugu (Whatsapp-ez ere bai), eta proiektuari buruz informazio gehiago edota harremanetarako: hurbiltzen@topagunea.eus edo 688 74 21 01 zenbakia daude”.

Sentsibilizazio hitzaldiak ere bai

Proiektuaren baitan sentsibilizazio hitzaldi batzuk egitea “egokia” ikusten zutela azaldu dute antolatzaileek, eta hiru hitzaldi prestatu dituzte: Kulturartekotasuna eta elkarbizitza, gaitasunak eta motibazioak; Identitatea eta ama hizkuntza: euskararekiko hurbilpena; eta Nola lagundu haurrari etxeko lanak egiten euskaraz ez badakit?. Azken horren bidez, familia askok etxean izan dezaketen “arazoa edo zailtasuna” jarri nahi izan dute mahai gainean. “Arrate Gisasola eta Iñaki Eizmendi hizlarien laguntzarekin, familiei aspektu honen inguruan gako batzuk ematen saiatu gara”, zehaztu dute.

Dagoeneko hasi dira hitzaldiekin, eta Soraluzen antolatu zuten lehenengoa urriaren 29an: “COVID-19aren ondorioz formatu mixto batetan eskaini genuen, hasieran proiektuaren aurkezpen labur bat egin zen herriko antzokian eta gero grabatutako bideo bat proiektatu genuen, hizlarien mahai inguru batekin”. Azken zatia ikusgarri jarri dute webgunean ere.

Horri lotuta, azaldu dute pandemiaren ondorioz, hitzaldiaren formatua “etengabe” egokitu behar izan dutela, eta baliabide teknologikoak baliatzen ari direla; horren adibide, hurrengo bi sentsibilizazio hitzaldiak streaming bidez egingo dituztela. “Hitzaldietan parte hartzea doakoa da, mugikor bat edukita egin liteke, baina aurretik izena ematea eskatzen dugu, hori egiten duten pertsonei informazio osoa eman ahal izateko”, adierazi dute. Hurrengo hitzaldia Kulturartekotasuna eta elkarbizitza, gaitasunak eta motibazioak izango da, azaroaren 19an, eta azkena Identitatea eta ama hizkuntza: Euskararekiko hurbilpena azaroaren 24an.

Gizarteko beharretatik abiatutako asmoa

Proeiktuaren sorreraz galdetuta, geroz eta “anitzagoa” den gizartea jarri dute abiapuntutzat: “Migrazio fenomenoek ekarri dute gero eta jatorri, kultura, erlijio eta hizkuntza ezberdin kopurua handitzea azken urteotan. Gure ikuspuntutik aniztasun horrek guztiak aberastasun handia dakarkio Euskal Herriko gizarteari. Gero eta entitate eta eragile gehiagok lan egiten dute aniztasunaren alde, eta aurrerapausoak ematen ari gara guztion artean  bizikidetza  hobe  baten  alde”.  Hala, esan dute “proiektu asko”  daudela  esparru  honekin  lotuta, eta Euskaltzaleen Topagunean urte luzez ari direla hizkuntza aniztasunean lanean. “Euskal Herrira etorri direnei harrera integrala eskaintzeko hainbat egitasmo egin ditugu”, gehitu dute. 

Bide horri jarraiki, adierazi dute Hurbiltzen egitasmoaren bitartez, Euskal Herrira etorri berri diren familiei harrera “hizkuntzaren aldetik” egitea nahi dutela, edo bestela, euskaratik urrun daudenei “euskarara hurbiltzeko aukera” eskaintzea: “Euskara erdigunean jarriz eta haurren euskarazko mintzapraktika sustatuz, herriko beste familiekin harremanetan jartzea da gure proposamena”. 

Pandemiak eragindako arrakala

Koronabirusak ekarritako egoerak, hainbat alorretan izan du eragina, eta arrakala ugari eragin ditu; tartean, hizkuntzarena. Horren inguruan ere galdetu diegu Hurlbiltzen proiektuaren atzean daudenei, eta etxean euskarazko transmisiorik ez duten familiek, itxialdian, “behar handia” nabaritu zutela azpimarratu dute: “Horren isla da haur askoren euskara mailak pairatutako atzerakada. Ezaugutzen ditugu hainbat herri, zeinetan itxialdi garaian herritar boluntarioak aktibatu eta naturalki sareak sortu zituzten, aipatutako arazoari irtenbidea eskaintzeko, baina itxialdia amaitzerakoan sare hauek modu orokorrean desartikulatu ziren”.

Ideia hori aintzat hartuz, sustatzaileen arabera, Hurbiltzen proiektuak familia boluntarioak aktibatzea nahi du, “hazia ereiteko” askotariko moduak daudelako: “Gainera, pandemiaren beste ondorioetako bat antisozialtasuna areagotzea izan da, eta uste dugu horrelako proiektuak inoiz baino beharrezkoago direla, familien arteko topaketak bultzatzeko, hizkuntz aniztasuna eta kulturartekotasuna aitortzeko eta euskara partekatzeko”.

Etiketak: